Güclü fırtına ABŞ-də daşqın və nəqliyyat xaosu yaratdı
ABŞ-nin şimal-şərqində güclü fırtına on milyonlarla insan üçün təhlükə yaradıb, bölgədə daşqınlar, elektrik kəsintiləri və nəqliyyat problemləri baş verib.
Crossmedia.az xəbər verir ki, “BBC” bu barədə məlumat yayıb.
“Nor'easter” adlandırılan güclü fırtınanın şənbə günü pik həddə çatacağı gözlənilir. ABŞ Milli Meteorologiya Xidməti Nyu-York və Boston da daxil olmaqla bir sıra ərazilərdə təhlükəli sahil daşqınları, güclü küləklər və intensiv yağışların müşahidə olunacağını bildirib.
Nyu-York və Nyu-Cersi ştatlarında fövqəladə vəziyyət elan edilib. Nyu-Cersinin bəzi sahilyanı ərazilərində artıq genişmiqyaslı daşqınlar qeydə alınıb. Virciniyadan Menə qədər olan ərazilərdə də güclü yağış və külək proqnozlaşdırılır.
Fırtına səbəbindən bir sıra tədbirlər təxirə salınıb. Onların arasında müğənni Ed Şiranın Bostonda çoxdan gözlənilən konserti də var.
Təbii fəlakət bölgədə genişmiqyaslı elektrik kəsintilərinə səbəb olub. “PowerOutage.us”un məlumatına görə, indiyədək təxminən 150 min ev elektrik enerjisiz qalıb.
ABŞ Federal Aviasiya Administrasiyası sərnişinlərə uçuşlarının vəziyyətini aviaşirkətlərlə dəqiqləşdirməyi tövsiyə edib. “FlightAware”in məlumatına görə, 1 100-dən çox reys gecikib, daha 400 reys isə ləğv edilib.
Şənbə günü tam Ayın sahilyanı ərazilərdə daşqınların daha da güclənməsinə səbəb olacağı bildirilib. Nyu-Cersinin Surf Siti və Manaskuan sahil icmalarında küçə və evlərə su dolub.
Nyu-Cersi qubernatoru Mikki Şerrill sakinləri fırtınaya ciddi yanaşmağa, ehtiyatlı olmağa və yerli qurumların tövsiyələrinə əməl etməyə çağırıb.
22:02 26.09.2026
Oxunuş sayı: 37
