Xarici xəbərlər

İsrailin Suriya zərbəsinin arxasında nə var?

İsrailin Suriyanın Ebu Zuhur Hərbi Hava Bazasına endirdiyi zərbədən sonra bölgədəki güc mübarizəsi yenidən gündəmə gəlib.

Crossmedia.az ˝Haber Global˝a istinadən xəbər verir ki, İsrailin Suriyadakı addımlarının təkcə hərbi təhlükəsizlik məsələləri ilə məhdudlaşmadığı, eyni zamanda Şərqi Aralıq dənizində enerji resursları, karbohidrogen yataqları və regional təsir uğrunda mübarizə ilə əlaqəli olduğu iddia edilir.

Tel-Əvivin hücumu Türkiyənin Suriyada mümkün hərbi mövcudluğu ilə əsaslandırdığı bildirilsə də, Ankara və Dəməşq bu iddiaları rədd edib. Suriya rəhbərliyi İsrailə əvvəlcədən Türkiyə bazasının qurulmayacağı barədə məlumat verildiyini açıqlayıb.

ABŞ-nin Türkiyədəki səfiri və Suriyanın xüsusi nümayəndəsi Tom Barak isə İsrailin hücumunu lazımsız eskalasiya adlandırıb və tərəfləri gərginliyi azaltmağa çağırıb.

İsrail səfirindən Türkiyə ilə bağlı açıqlama

İsrailin Vaşinqtondakı səfiri Yexiel Leyter bildirib ki, İsrail Türkiyə və ya Suriya ilə müharibə istəmir. Lakin o, Ebu Zuhur məsələsində qırmızı xəttin keçildiyini iddia edib.

Türkiyə isə Suriyada hərbi baza yaratmaq planının olmadığını bəyan edib.

Ehud Barak hökuməti tənqid etdi

İsrailin keçmiş Baş naziri Ehud Barak hökumətin Türkiyə ilə gərginliyi qəsdən artırdığını bildirib.

Onun sözlərinə görə, Baş nazir Benyamin Netanyahu bölgədə yeni böhran yaratmaqla daxili siyasətdə təhlükəsizlik narahatlıqlarından istifadə etməyə çalışır.

Barak bu siyasəti məsuliyyətsiz və ağılsız adlandırıb.

Enerji resursları əsas hədəf kimi göstərilir

Analitiklər hesab edirlər ki, İsrailin Suriya siyasəti yalnız hərbi məqsədlərlə izah edilə bilməz.

Ekspertlər Şərqi Aralıq dənizindəki qaz yataqları, enerji marşrutları və dəniz sərhədləri uğrunda rəqabətin də bu prosesdə rol oynadığını bildirirlər.

Bəzi mütəxəssislər İsrailin Livandan Suriyanın cənubuna qədər təhlükəsizlik xətti yaratmağa çalışdığını və bunun Türkiyənin bölgədəki təsirini məhdudlaşdırmaq məqsədi daşıya biləcəyini iddia edir.

Regional güc mübarizəsi dərinləşir

Analitiklərin fikrincə, Suriyanın uzunmüddətli qeyri-sabitliyi Türkiyənin sərhəd təhlükəsizliyi və regional siyasət yükünü artırır.

Eyni zamanda İsrail-Yunanıstan-Cənubi Kipr əməkdaşlığının genişlənməsi enerji, dəniz hüquqları və təhlükəsizlik məsələlərini bir araya gətirir.

🖨 Çap et

04:22 23.08.2026

Oxunuş sayı: 66