Bu layihənin mənası yoxdur – “Tramp marşrutu” barədə sərt açıqlama
Politoloq Andrey Şkolnikov bildirib ki, “Tramp marşrutu” adlandırılan layihənin hazırkı şəraitdə heç bir mənası yoxdur və bu təşəbbüsə ABŞ və Çinin belə marağı azalıb.
Crossmedia.az ˝Sputnik Armenia˝-ya istinadən xəbər verir.
Şkolnikov qeyd edib ki, əvvəllər TRIPP layihəsinin əsas faydalananı Çin olmalı idi. Pekin öz mallarını Avropaya çatdırmaq üçün Qərb-Şərq nəqliyyat dəhlizinin qollarından birini yaratmağı planlaşdırırdı.
Ekspert Çinin layihəyə marağının azalmasını iki amillə izah edib: Avropa bazarında tələbin zəifləməsi və nəqliyyat əlaqələrinin potensial şəkildə qırılması.
Şkolnikov ABŞ-nin da regiondakı maraqlarının azaldığını bildirib. Onun sözlərinə görə, Vaşinqton Avropa və Yaxın Şərqdə iştirakını tədricən azaldır, buna görə də Cənubi Qafqazda bu layihəyə böyük maraq göstərməsi gözlənilmir.
Politoloq əlavə edib ki, layihəyə maraq göstərən digər xarici qüvvə Böyük Britaniyadır. Onun fikrincə, Londonun bu cür təşəbbüslərə marağı əsasən Rusiya ilə geosiyasi rəqabətlə bağlıdır.
Şkolnikovun sözlərinə görə, layihəyə ən çox ehtiyac duyan tərəflər Türkiyə, Azərbaycan və Mərkəzi Asiya ölkələri kimi türk dövlətləridir. Onlar bu vasitə ilə vahid nəqliyyat əlaqəsi yaratmağa, geosiyasi layihə formalaşdırmağa və mövcud maneələri aradan qaldırmağa çalışırlar.
20:42 19.08.2026
Oxunuş sayı: 45
