Səudiyyə Ərəbistanı Səna hava limanına zərbələr endirib
Səudiyyə Ərəbistanının hərbi aviasiyası Yəmənin husilərin nəzarətində olan paytaxtı Sənadakı beynəlxalq hava limanına hava zərbələri endirib.
Crossmedia.az xəbər verir ki, bu barədə xarici KİV məlumat yayıb.
Məlumata görə, hücumlar İranın Mahan Air aviaşirkətinə məxsus təyyarənin Sənaya husi rəhbərliyinin nümayəndələrini və iranlı diplomat Əli Məhəmməd Rəzaini gətirməsindən sonra həyata keçirilib.
Beynəlxalq ictimaiyyət tərəfindən tanınan Yəmən hökuməti və Səudiyyə Ərəbistanı bu reysi ölkənin suverenliyinin pozulması və gərginliyin təhlükəli şəkildə artırılması kimi qiymətləndiriblər.
Qeyd edək ki, 2014-cü ildən etibarən Səna tamamilə husi hərəkatının ("Ənsar Allah") nəzarətindədir. Paytaxtdakı dövlət qurumları, nazirliklər və hərbi obyektlər onların nəzarətində fəaliyyət göstərir.
Beynəlxalq səviyyədə tanınan Yəmən hökuməti isə paytaxtı tərk edərək müvəqqəti paytaxt elan olunan cənubdakı Ədən şəhərinə köçüb və hazırda nəzarətində olan əraziləri oradan idarə edir.
17:15 13.07.2026
Oxunuş sayı: 48
