Fransada qadın polis zorakılığından şikayət edib
Fransada üç həftədən çoxdur davam edən lisey şagirdlərinin etirazları zamanı bir qadın polis əməkdaşının ona qarşı cinsi və fiziki zorakılıq etdiyini iddia edib. Paris Bələdiyyə Şurasının üzvü Simon Duquerroir hadisənin şahidi olduğunu bildirib.
Crossmedia.az xəbər verir ki, bu barədə BFMTV məlumat yayıb.
Məlumata görə, oktyabrın 8-də Parisdə lisey şagirdlərinin etiraz aksiyasına qatılan 31 yaşlı qadın nümayişçiləri nəzarətə götürməyə çalışan polis əməkdaşının ona qarşı zorakılıq etdiyini iddia edərək şikayət verib.
Qadın hadisə ilə bağlı Fransa polisinin fəaliyyətinə nəzarət edən və polis əməkdaşları barəsində araşdırma aparan Milli Polis Baş Müfəttişliyinə (IGPN) müraciət edib.
Aksiya iştirakçısının vəkili bildirib ki, müvəkkili baş verənlərdən sarsılıb. Onun sözlərinə görə, hadisənin baş verdiyi şərait polis əməkdaşının şəxsiyyətinin müəyyənləşdirilməsini çətinləşdirir.
Paris Bələdiyyə Şurasının üzvü Simon Duquerroir də mətbuata açıqlamasında hadisə zamanı aksiyada olduğunu deyib. O, qadının qışqırıqlarını eşitdikdən sonra hadisə yerinə yaxınlaşdığını bildirib.
Fransada şagirdlərin daha yaxşı təhsil şəraiti tələbi ilə keçirdikləri aksiyalar zamanı indiyədək 6 877 nəfər saxlanılıb, 21 nəfər həbs edilib. Polis zorakılığı ilə bağlı müzakirələrə səbəb olan nümayişlərdə 1 000-dən çox insanın yaralandığı bildirilir.
17:20 11.10.2026
Oxunuş sayı: 66
