Azərbaycan ilə Ermənistan arasında ticarət dövriyyəsinin genişləndirilməsi üçün real imkanlar mövcuddur
Azərbaycan Prezidenti İlham Əliyevin Amerika Birləşmiş Ştatlarının Prezidenti Donald Trampa ünvanladığı təbrik məktubunda yer alan “Azərbaycan və Ermənistan artıq sülh şəraitində yaşayır və ticarət münasibətləri qururlar” fikri regional münasibətlərin gələcək inkişafı ilə bağlı diqqət çəkən mesajlardan biri kimi qiymətləndirilir. Dövlət başçısının bu fikri Cənubi Qafqazda postmünaqişə dövrünün yeni mərhələyə qədəm qoyduğunu, tərəflər arasında qarşılıqlı etimadın və iqtisadi əməkdaşlıq imkanlarının formalaşmağa başladığını göstərən mühüm siyasi mesaj hesab olunur. Maraqlıdır, bu bəyanat Azərbaycan-Ermənistan münasibətlərinin gələcək perspektivləri baxımından hansı məna daşıyır? Sülh prosesinin iqtisadi əməkdaşlıq mərhələsinə keçməsi nə dərəcədə realdır və bu, regionun gələcək inkişafına necə təsir göstərə bilər?
Mövzu ilə bağlı Milli Məclisin deputatı
Vüqar Bayramov Crossmedia.az-a açıqlama verib: “Azərbaycan sülh gündəliyinə
sadiq qalaraq Ermənistanla ticarət əlaqələrinin mərhələli şəkildə bərpasını,
eyni zamanda ölkə ərazisindən Ermənistan yüklərinin daşınması ilə bağlı bütün məhdudiyyətlərin
aradan qaldırılmasını dəstəkləyir. Bu baxımdan, söhbət regionda yeni əməkdaşlıq
modelinin formalaşmasından gedir. Bu, birmənalı şəkildə Azərbaycanın təşəbbüsü
və dəstəyi ilə Cənubi Qafqazda sülhün və əməkdaşlığın möhkəmlənməsi anlamına gəlir.
Hazırda Azərbaycan Ermənistana yanacaq məhsulları ixrac edir və praktik olaraq
Azərbaycan ilə Ermənistan arasında ticarət dövriyyəsinin genişləndirilməsi üçün
real imkanlar mövcuddur. İlkin qiymətləndirmələr göstərir ki, hazırda ən azı səkkiz
məhsul qrupu üzrə Azərbaycan və Ermənistan arasında qarşılıqlı ticarətin
qurulması mümkündür. Bunlar hər iki ölkənin bazarında tələbat olan məhsullardır.
Yəni həm Azərbaycanın Ermənistana, həm də Ermənistanın Azərbaycana ixrac edə
biləcəyi məhsullardan söhbət gedir”.
Deputat əlavə edib ki, sülh müqaviləsinin
imzalanması, kommunikasiyaların bərpası və ticari əlaqələrin tam şəkildə bərpa
olunması nəticəsində iki ölkə arasında illik orta hesabla 300 milyon dollar həcmində
ticarət dövriyyəsinin formalaşması mümkün ola bilər: “Azərbaycan ilə Ermənistan
arasında sülh prosesi Avropa Komissiyasının Prezidentinin regiona səfəri zamanı
dövlət başçılarının mətbuata bəyanatlarında da xüsusi yer aldı. Azərbaycan
Prezidenti də çıxışında ölkəmizin regional sülhə verdiyi töhfəni xüsusi vurğuladı.
Bu proses eyni zamanda Avropa İttifaqı tərəfindən də dəstəklənən və müsbət qiymətləndirilən
bir istiqamətdir. Bu baxımdan, tərəflər arasında əməkdaşlığın əsasları artıq
formalaşmaqdadır. Sülh müqaviləsinin imzalanması isə bu prosesin daha da genişlənməsinə,
iqtisadi əlaqələrin inkişafına və Azərbaycan ilə Ermənistan arasında davamlı
ticarət münasibətlərinin qurulmasına əlverişli şərait yarada bilər”.
Ayhan
20:35 06.07.2026
Oxunuş sayı: 54
