Zəhərlənmələr kütləviləşir: Ekspertlər səbəbləri açıqladı
Bu ilin may ayında Kliniki Tibbi Mərkəzin Toksikologiya şöbəsinə müxtəlif mənşəli zəhərlənmə diaqnozu ilə onlarla şəxs müraciət edib. Hospitalizasiya olunan pasiyentlərin böyük əksəriyyətinin həyatını xilas etmək mümkün olsa da, bəzi hallarda ağır nəticələrin qarşısını almaq mümkün olmayıb. Mərkəzdən verilən məlumata görə, ay ərzində ümumilikdə 85 nəfər zəhərlənmə səbəbilə stasionar müalicəyə cəlb olunub. Həkimlərin həyata keçirdiyi intensiv müalicə və detoksikasiya tədbirləri nəticəsində 83 nəfər sağalaraq evə buraxılıb, lakin bütün səylərə baxmayaraq, 2 pasiyent vəfat edib. Maraqlıdır yay aylarında bu cür zəhərlənmə hallarının artmasına əsas səbəb nələrdi?
Məsələ ilə bağlı həkim allerqoloq Şahvələd Məmmədov Crossmedia.az-la öz fikirlərini bölüşüb: "Ümumiyyətlə, zəhərlənmələr müxtəlif səbəblərdən baş verir. Bunlara qida, qaz, dərman və kimyəvi maddələrdən zəhərlənmələr, eləcə də digər faktorlarla bağlı hallar daxildir. Gündəlik həyatda ən çox rast gəlinən zəhərlənmələr isə qida məhsulları ilə əlaqədardır. Qida zəhərlənmələri arasında konservləşdirilmiş və düzgün saxlanılmayan məhsullar daha ciddi risk yaradır. Xüsusilə yay aylarında bu məsələyə daha həssas yanaşmaq lazımdır. Turşuların və digər konserv məhsullarının hazırlanması zamanı tərəvəz və meyvələrin kifayət qədər yuyulmaması, qablaşdırma qaydalarına əməl edilməməsi sonradan zəhərlənməyə səbəb ola biləcək bakteriya və digər zərərli amillərin yaranmasına şərait yaradır. Bundan əlavə, yay mövsümündə balıq məhsulları, müxtəlif konservlər və turşular da risk qrupuna daxildir. Buna görə vətəndaşlar qida məhsullarının hazırlanması və saxlanılması zamanı sanitar-gigiyenik qaydalara ciddi riayət etməli, xüsusilə isti havalarda ehtiyatlı olmalıdırlar".
Qida üzrə ekspert Fərid Səfərov isə zəhərlənmə hallarının xüsusilə isti aylarda daha da artdığını və bu statistika qida təhlükəsizliyi məsələsinin nə qədər vacib olduğunu bir daha göstərdiyuni qeyd edib: "Zəhərlənmələrin bir qismi keyfiyyətsiz və ya düzgün saxlanılmayan qidaların qəbulu, göbələk zəhərlənmələri, məişət kimyəvi maddələri və müxtəlif dərman vasitələrinin düzgün istifadə olunmaması ilə bağlı olur. Sevindirici haldır ki, Kliniki Tibbi Mərkəzin həkimləri tərəfindən aparılan vaxtında və düzgün müalicə tədbirləri nəticəsində əksər pasiyentlərin həyatı xilas edilib. Lakin iki nəfərin həyatını itirməsi göstərir ki, zəhərlənmələr heç də sadə və diqqətdən kənar qalmalı problem deyil. Vətəndaşlar xüsusilə yay mövsümündə qidaların saxlanma temperaturuna diqqət etməli, mənşəyi məlum olmayan məhsullardan uzaq durmalı, konservləşdirilmiş və tez xarab olan qidaları ehtiyatla istehlak etməlidirlər. Zəhərlənmə əlamətləri – ürəkbulanma, qusma, ishal, qarın ağrısı və halsızlıq yarandıqda isə özbaşına müalicə ilə vaxt itirmədən dərhal həkimə müraciət etmək vacibdir. Unutmayaq ki, qida təhlükəsizliyi yalnız istehsalçıların deyil, həm də hər bir istehlakçının məsuliyyətidir və sadə profilaktik tədbirlər bir çox ağır nəticələrin qarşısını ala bilər".
Elmir Heydərli
18:19 02.06.2026
Oxunuş sayı: 44
