Kremlin mesajı: Ermənistanın müstəqilliyinə qarşı təzyiq siyasəti
Son illər Rusiya ilə Ermənistan arasında münasibətlərdə müşahidə olunan gərginlik getdikcə daha açıq xarakter almağa başlayıb. Vaxtilə strateji müttəfiq hesab edilən iki ölkə arasında siyasi etimadın zəifləməsi iqtisadi sahədə də özünü göstərib. Ermənistan məhsullarına tətbiq olunan müxtəlif məhdudiyyətlərdən sonra indi Rusiyanın İrəvandakı səfirini məsləhətləşmələr üçün geri çağırması münasibətlərdə yeni gərginlik mərhələsinin başladığını göstərir.
Ekspertlərin fikrincə, tərəflər arasında yaranan narazılıqların kökündə Ermənistanın son illərdə xarici siyasətdə daha müstəqil xətt yürütmək və Qərblə əlaqələrini genişləndirmək cəhdləri dayanır. Bəs Moskva ilə İrəvan arasında münasibətlərin soyumasının əsası harada qoyuldu? Rusiyanın sərt reaksiyalarının arxasında hansı geosiyasi məqsədlər dayanır və Kreml bununla Ermənistana hansı mesajı verməyə çalışır?
Mövzu ilə bağlı politoloq Vaqif Hüseyn Crossmedia.az-a açıqlama verib:
“Bu, Rusiyanın köhnə siyasətidir və bunu hamı yaxşı bilir. Rusiya özünün təsir dairəsindən, daha doğrusu, öz orbitindən kənara çıxmağa çalışan dövlətləri müxtəlif üsullarla cəzalandırmağa çalışır. Bu, Moskvanın uzun illərdir tətbiq etdiyi ənənəvi yanaşmadır. Maraqlıdır ki, Rusiya bunu artıq ikinci dəfə Avrasiya İqtisadi İttifaqına üzv olan bir ölkəyə qarşı həyata keçirir. Halbuki Avrasiya İqtisadi İttifaqının əsas məqsədlərindən biri vahid iqtisadi məkan formalaşdırmaqdır. Bu məkan daxilində malların, xidmətlərin, kapitalın və işçi qüvvəsinin sərbəst hərəkəti təmin olunmalıdır. Belə olan halda, üzv ölkələrə qarşı iqtisadi məhdudiyyətlərin tətbiq edilməsi ittifaqın mahiyyətinə zidd görünür”.
Politoloq əlavə edib ki, bu fakt Rusiya üçün hətta özünün təşəbbüsü ilə yaradılmış inteqrasiya qurumları belə siyasi maraqlardan üstün olmadığını göstərir: “Müqayisə üçün Avropa İttifaqına baxaq. Məsələn, Macarıstanla Brüssel arasında Viktor Orban dövründə ciddi fikir ayrılıqları və siyasi gərginliklər yaşanıb. Buna baxmayaraq, Avropa İttifaqı macar mallarının, kapitalının və vətəndaşlarının sərbəst hərəkətinə maneələr yaratmayıb. Mübahisələr əsasən maliyyə fondlarından ayrılan vəsaitlərlə bağlı olub. Rusiya isə hətta özünün yaratdığı dövlətüstü qurum daxilində belə fərqli siyasət yürüdür. Bu da Moskvanın keçmiş sovet məkanına necə baxdığını açıq şəkildə göstərir. Məqsəd aydındır: Rusiya keçmiş ittifaq ölkələrini hələ də öz təsir dairəsinin bir hissəsi hesab edir və onların müstəqil siyasi və iqtisadi seçimlər etməsini hər zaman rahat qarşılamır”.
Ayhan
19:10 30.05.2026
Oxunuş sayı: 42
