Rusiya bir gündə Ukraynada üç sərnişin qatarına zərbə endirib
Rusiya qüvvələrinin Ukraynada sərnişin qatarlarına hücumları nəticəsində bir dəmiryol əməkdaşı həlak olub, Sumi vilayətində isə bir neçə sərnişin yaralanıb.
Crossmedia.az xəbər verir ki, Ukraynanın Dövlət Fövqəladə Hallar Xidməti və Ukrayna Dəmir Yollarının məlumatına görə, sentyabrın 8-də ölkənin müxtəlif bölgələrində sərnişin qatarlarına azı üç hücum qeydə alınıb.
Zaporojye vilayətində Dnepr–Zaporojye marşrutu üzrə hərəkət edən sərnişin qatarı pilotsuz uçuş aparatı ilə vurulub. Hücumdan əvvəl təhlükə barədə xəbərdarlıq edildiyindən sərnişinlər qatardan çıxarılıb və təhlükəsiz əraziyə yerləşdirilib. Lakin qatarın bələdçilərindən biri təxliyədən sonra yenidən qatara qayıdıb və zərbə nəticəsində həlak olub.
Bundan əvvəl Sumi vilayətində Kiyev–Sumi sərnişin qatarına pilotsuz uçuş aparatları ilə iki zərbə endirilib. Qatar əvvəlcədən dayandırılıb və 90 sərnişin təxliyə edilib. Bu hücum nəticəsində ölən və yaralanan olmayıb.
Daha sonra Sumi vilayətində daha bir şəhərətrafı dizel qatarına hücum edilib. Sərnişinlər əvvəlcədən təxliyə olunsa da, onların bir hissəsi təhlükəsiz məsafəyə vaxtında çata bilməyib. İlkin məlumata görə, bir neçə nəfər qəlpə yarası alıb.
Ukrayna Dəmir Yollarının rəhbəri Oleksandr Pertsovski sərnişinlərə hücum zamanı dərhal sığınacaqlara getməyi, belə imkan olmadıqda isə qatardan ən azı 200 metr uzaqlaşmağı çağırıb.
18:21 08.09.2026
Oxunuş sayı: 41
