BDU WUF13-də iqlimə dayanıqlı şəhərlər üçün hidroponik həllərə dair xüsusi təlim sessiyası təşkil edib
BMT-nin Ümumdünya Şəhərsalma Forumunun 13-cü sessiyası (WUF13) çərçivəsində Bakı Dövlət Universitetinin (BDU) təşkilatçılığı ilə “Yaşıl evlər, yaşıl eyvanlar: İqlimə dayanıqlı şəhərlər üçün hidroponik həllər” adlı xüsusi təlim sessiyası keçirilib.
Crossmedia.az xəbər verir ki, sessiyanın açılışında moderator Mirhüseyn Tağıyev tədbirin məqsədi və BDU-nun WUF13 çərçivəsində həyata keçirdiyi təşəbbüslər barədə məlumat verib.
Qeyd olunub ki, BDU WUF13 çərçivəsində “Clean Charge” startapı ilə “Business Innovation Hub”da, “WUF Academy” təlim proqramında, “Youth at the Core of Housing Solutions” adlı panel müzakirəsində, eləcə də rəsmi sərgi stendi ilə təmsil olunur.
Sessiya çərçivəsində layihənin rəhbəri, BDU-nun Hüceyrə kulturası və genom redaktəsi laboratoriyasının müdiri Qumru Hüseynova çıxış edərək hidroponik sistemlərin evlərdə və eyvanlarda tətbiqi, orqanik qida istehsalı və yaşıl şəhər mühitinin formalaşdırılmasında bu yanaşmanın əhəmiyyətindən danışıb. Bildirib ki, layihə şəhər evləri və eyvanlarında kiçikölçülü hidroponik sistemlərin tətbiqi vasitəsilə iqlimə dayanıqlı, resurslara qənaət edən və sağlam yaşayış mühitlərinin yaradılmasına töhfə verməyi hədəfləyir.
Daha sonra “Grand Agro İnvitro” MMC-nin baş icraçı direktoru Ramil Azməmmədov “Böyüyən şəhərlərin qida təminatı: süni intellekt, su səmərəliliyi və kənd təsərrüfatının gələcəyi” mövzusunda təqdimatla çıxış edərək, müasir texnologiyaların aqrar sahədə tətbiqi və şəhər qida təhlükəsizliyinə təsiri barədə danışıb.
Tədbir çərçivəsində BDU-nun Tələbə Elmi-Texniki Yaradıcılıq Mərkəzinin direktoru İlyas Nəsibov Universitetdə həyata keçirilən startap layihələri, innovasiya təşəbbüsləri və tələbələrin elmi-texniki yaradıcılığının dəstəklənməsi istiqamətində görülən işlər barədə məlumat verərək, “EkoEnerji” məntəqəsi layihəsini təqdim edib.
Biologiya fakültəsinin Biomühəndislik laboratoriyasının elmi araşdırmaçısı Nurlan Əmrahov “Ev üçün hidroponik sistemlər: konstruksiya, üstünlüklər və şəhər həyatında tətbiqi” mövzusunda çıxış edərək, hidroponik sistemlərin qurulması və gündəlik istifadəsi barədə məlumat verib.
BDU-nun Ekologiya və torpaqşünaslıq fakültəsinin müəllimi Zərxanım Ağayeva isə “Gələcəyin yaşıl şəhərlərinin salınmasında biotexnologiyanın rolu” mövzusunda təqdimatla çıxış edib, biotexnologiyanın davamlı şəhər inkişafında əhəmiyyətini vurğulayıb.
Sessiya zamanı iştirakçılara davamlı şəhər həyatı, su resurslarından səmərəli istifadə, yerli qida istehsalı, şəhər yaşıllaşdırılması və iqlimə uyğunlaşma həlləri barədə məlumatlar təqdim olunub.
Qeyd edilib ki, interaktiv formatda keçirilən təlimdə ekspert təqdimatları, vizual materiallar, qrup işi və ssenari əsaslı tapşırıqlar birləşdirilərək, iştirakçılara öz şəhərləri üçün “yaşıl ev” və “yaşıl eyvan” konsepsiyalarının hazırlanması imkanı yaradılıb.
Tədbir sual-cavab sessiyası ilə davam edib.
17:17 19.05.2026
Oxunuş sayı: 46
