Bakı forumu Azərbaycanın beynəlxalq nüfuzunu göstərdi - Arzuman Abdulkərimov
Müasir dövrdə şəhərsalma yalnız yeni binaların və yaşayış massivlərinin inşası ilə məhdudlaşmır. Bu sahə artıq dövlətlərin inkişaf səviyyəsini, tarixi-mədəni irsə münasibətini, ekoloji yanaşmasını və gələcəyə baxışını müəyyən edən əsas istiqamətlərdən birinə çevrilib.
Dünyanın müxtəlif ölkələrində urbanizasiya prosesinin sürətlənməsi şəhərlərin planlı şəkildə inkişaf etdirilməsini, insanların rahat yaşayışının təmin olunmasını və tarixi irsin qorunmasını daha da aktual edib.
Azərbaycan da son illərdə şəhərsalma və memarlıq sahəsində mühüm addımlar atan ölkələr sırasında yer alır.
Xüsusilə, paytaxt Bakı ilə yanaşı, bölgələrdə həyata keçirilən yenidənqurma layihələri, müasir infrastrukturun qurulması və işğaldan azad edilmiş ərazilərdə aparılan genişmiqyaslı bərpa işləri ölkənin bu sahədə yeni inkişaf mərhələsinə qədəm qoyduğunu göstərir.
Bu baxımdan, Bakıda keçirilən beynəlxalq şəhərsalma forumu həm Azərbaycanın əldə etdiyi nailiyyətlərin təqdimatı, həm də qlobal təcrübələrin müzakirəsi baxımından xüsusi əhəmiyyət daşıyır.
Məsələ ilə bağlı politoloq Arzuman Abdulkərimov Crossmedia.az-la öz fikirlərini bölüşüb:
"Azərbaycan Prezidenti İlham Əliyevin mayın 18-də Bakıda keçirilən Ümumdünya Şəhərsalma Forumunun 13-cü sessiyasındakı çıxışı həm şəhərsalma, həm memarlıq, həm də Azərbaycanın inkişaf modeli baxımından diqqətçəkən və əhatəli çıxışlardan biri oldu.
Prezident çıxışında ölkəmizdə qədim memarlıq ənənələrinin qorunması, müasir şəhərsalma prinsiplərinin tətbiqi, işğaldan azad olunmuş ərazilərdə həyata keçirilən genişmiqyaslı quruculuq və abadlıq işləri, yeni şəhər və kənd konsepsiyalarının hazırlanması, eləcə də ətraf mühitin mühafizəsi istiqamətində görülən işlər barədə ətraflı fikirlər səsləndirdi. Dövlət başçısının strateji yanaşması və gələcəyə hesablanmış mesajları beynəlxalq iştirakçıların da diqqətini cəlb etdi.
Qeyd olunduğu kimi, forum rekord səviyyədə iştirakçı sayı ilə yadda qalıb. Belə ki, 180 ölkədən 45 mindən artıq iştirakçının qeydiyyatdan keçməsi tədbirin beynəlxalq nüfuzunu və əhəmiyyətini bir daha nümayiş etdirir.
Bu forum, 2019-cu ildən sonra Azərbaycanda keçirilən ən böyük beynəlxalq tədbirlərdən biri hesab olunur və yüksək səviyyədə təşkil edilməsi ölkəmizin qlobal platformalarda artan rolunu göstərir.
Bakı şəhərinin qədim memarlıq nümunələri ilə müasir urbanizasiya modelinin vəhdəti də forum iştirakçılarına əyani şəkildə təqdim edilir.
Bu ilin Azərbaycanda “Şəhərsalma və Memarlıq İli” elan olunması da təsadüfi deyil. Azərbaycan bu istiqamətdə BMT-nin aidiyyəti qurumları, xüsusilə BMT-nin Məskunlaşma Proqramı ilə sıx əməkdaşlıq edir.
Bunun nəticəsidir ki, işğaldan azad olunmuş Ağdam, Zəngilan və Xankəndidə beynəlxalq standartlara uyğun şəhərsalma layihələri hazırlanır və həyata keçirilir.
Prezident İlham Əliyevin çıxışında Şirvanşahlar dövrünün memarlıq nümunələri, Şamaxı, Naxçıvandakı Möminə Xatun türbəsi, Gəncə və digər bölgələrdəki tarixi-mədəni abidələr barədə danışması Azərbaycanın zəngin tarixi irsinin beynəlxalq auditoriyaya təqdimatı baxımından xüsusi əhəmiyyət daşıyırdı.
Çıxış zamanı işğaldan azad edilmiş ərazilərdə görülən bərpa və yenidənqurma işlərinə də xüsusi diqqət ayrıldı. Vaxtilə “Qafqazın Xirosiması” adlandırılan Ağdam şəhərinin erməni vandalizmi nəticəsində tamamilə dağıdıldığı qeyd olunsa da, bu gün həmin ərazilərdə geniş quruculuq işlərinin aparıldığı vurğulandı. Azərbaycan yalnız şəhərləri yenidən inşa etmir, eyni zamanda müasir və dayanıqlı yaşayış mühiti formalaşdırır.
Ətraf mühitin qorunması istiqamətində həyata keçirilən layihələr də çıxışın əsas məqamlarından biri idi. Xüsusilə, neftlə çirklənmiş ərazilərin bərpası və “Qara şəhər”in müasir “Ağ şəhər” layihəsinə çevrilməsi nümunə kimi göstərildi.
Yeni parkların, ictimai məkanların, yaşıllıq zonalarının salınması Azərbaycanın şəhərsalma siyasətinin mühüm istiqamətlərindən biri kimi təqdim edildi.
Ümumilikdə, bu beynəlxalq forum Azərbaycanın dünyaya təqdimatı baxımından mühüm platforma hesab olunur. Tədbir çərçivəsində ölkəmizin tarixi, mədəniyyəti, şəhərsalma təcrübəsi və inkişaf modeli beynəlxalq ictimaiyyətə nümayiş etdirilir, eyni zamanda müxtəlif ölkələrin təcrübələrinin öyrənilməsi və gələcək perspektivlərin müzakirəsi üçün geniş imkanlar yaranır".
Elmir Heydərli
12:00 19.05.2026
Oxunuş sayı: 66
