Qəhrəman pilot İqor Kşnyakinin anadan olmasının ildönümüdür
Bu gün Azərbaycan Mülki Aviasiyasının tanınmış pilotu, “Azərbaycanın Milli Qəhrəmanı” İqor İvanoviç Kşnyakinin anadan olmasının ildönümüdür.
Crossmedia.az xəbər verir ki, İqor Kşnyakin 1962-ci il mayın 19-da Bakı şəhərində anadan olub. O, 1982-ci ildə Sasovo Mülki Aviasiya Uçuş Məktəbini bitirərək pilot peşəsinə yiyələnib, 1992-ci ildə isə Rusiya Dövlət Hidrometeorologiya İnstitutunda meteorologiya ixtisası üzrə təhsil alıb.
Əmək fəaliyyətinə 1982-ci ildə Yevlax Birləşmiş Aviasiya Dəstəsində An-2 təyyarəsinin ikinci pilotu kimi başlayan Kşnyakin daha sonra Zabrat aviadəstəsində, Azərbaycan Mülki Aviasiya İdarəsində və “Azərbaycan Hava Yolları” QSC-də müxtəlif vəzifələrdə çalışıb. O, Yak-40, Tu-134, An-140, ATR-42/72 və Embraer 170/190 tipli hava gəmilərində ikinci pilot və kapitan kimi xidmət edib.
Onun ümumi uçuş təcrübəsi 15 mindən çox saat təşkil edib, bunun böyük hissəsi kapitan kimi həyata keçirilən reyslərin payına düşüb.
Xatırladaq ki, 2024-cü il dekabrın 25-də “Azərbaycan Hava Yolları”na məxsus Embraer 190 təyyarəsinin qəzası zamanı Kşnyakin idarəetməni itirən təyyarəni Aktau istiqamətinə yönləndirərək mümkün xilas üçün sonadək cəhd göstərib. Qəza nəticəsində ekipaj üzvləri və sərnişinlərdən itkilər qeydə alınıb.
Hadisədən sonra İqor Kşnyakin ölümündən sonra “Azərbaycanın Milli Qəhrəmanı” adına layiq görülüb və 2024-cü il dekabrın 29-da II Fəxri Xiyabanda dəfn olunub.
Fatimə
11:32 19.05.2026
Oxunuş sayı: 56
