Belə forumlar Azərbaycanın beynəlxalq mövqeyini gücləndirir - Aydın Mirzəzadə
“WUF 13” ətrafında yaranan müzakirələr cəmiyyətin diqqət mərkəzində qalmaqda davam edir.
Xüsusilə, layihənin gələcək taleyi, mümkün hüquqi və texniki dəyişikliklər, eləcə də onun Azərbaycandakı fəaliyyət perspektivləri ilə bağlı müxtəlif fikirlər səsləndirilir.
Mövzunun aktuallığını nəzərə alaraq, məsələ ilə bağlı Milli Məclisin bir sıra deputatlarının mövqeyi öyrənilib.
Deputatlar açıqlamalarında həm WUF13-ün fəaliyyət istiqamətlərini, həm də bu sahədə qanunvericilik və nəzarət mexanizmlərinin təkmilləşdirilməsi ehtiyacını ön plana çəkiblər.
Onların fikrincə, qarşıdakı dövrdə qəbul olunacaq qərarlar layihənin gələcək inkişaf perspektivlərinə birbaşa təsir göstərəcək.
Məsələ ilə bağlı Milli Məclisin deputatı Aydın Mirzəzadə Crossmedia.az-la öz fikirlərini bölüşüb:
"Bu tip tədbirlərin müxtəlif ölkələrdə keçirilməsi yalnız növbəlilik prinsipi ilə deyil, həm də qlobal problemlərin həllinə töhfə vermək məqsədi daşıyır.
Azərbaycanın bu cür beynəlxalq forumlara ev sahibliyi etməsi isə ölkənin şəhərsalma və urbanizasiya sahəsində əldə etdiyi uğurların dünya ictimaiyyətinə təqdim olunması baxımından xüsusi əhəmiyyət kəsb edir.
Bu gün Azərbaycanda həm tarixi-mədəni irsin qorunması, həm müasir şəhərsalma konsepsiyalarının tətbiqi, həm də işğaldan azad edilmiş ərazilərdə həyata keçirilən genişmiqyaslı yenidənqurma və bərpa prosesi beynəlxalq diqqət mərkəzindədir.
Belə bir tədbirin Azərbaycanda keçirilməsi ölkəyə olan beynəlxalq marağı daha da artırır. Eyni zamanda, Azərbaycanın ərazi bütövlüyü məsələsinin dünya tərəfindən daha aydın və birmənalı şəkildə qəbul edilməsinə əlavə töhfə verir.
Forum çərçivəsində müxtəlif ölkələrin təcrübələrinin paylaşılması, Azərbaycanın şəhərsalma modelinin beynəlxalq müstəvidə təqdim olunması, həmçinin ikitərəfli görüşlərin, yeni layihələr və əməkdaşlıq istiqamətləri üzrə razılaşmaların əldə olunması ölkə üçün mühüm dividendlər yaradır.
Bütün bunlar forumun Azərbaycan üçün siyasi, iqtisadi və strateji əhəmiyyətini daha da artıran əsas məqamlardır".
Elmir Heydərli
10:35 19.05.2026
Oxunuş sayı: 58
