ABŞ-də Trampın dəstəklədiyi dini tədbir müzakirələrə səbəb olub
ABŞ-də Prezident Donald Tramp administrasiyasının dəstəklədiyi dini tədbir ölkədə kilsə-dövlət münasibətləri ilə bağlı müzakirələri yenidən gündəmə gətirib.
Crossmedia.az Reuters-ə istinadən xəbər verir ki, “Rededicate 250: National Jubilee of Prayer, Praise & Thanksgiving” adlı tədbir Vaşinqtonda keçirilir və ABŞ-nin 250 illiyi münasibətilə təşkil olunan proqram çərçivəsində baş tutur.
Tədbirdə əsasən evangelist xristian və mühafizəkar katolik icmalarının nümayəndələri iştirak edir. Donald Trampın video müraciətlə çıxış edəcəyi, ABŞ Müdafiə naziri (Pentaqonun rəhbəri) Pit Heqset də daxil olmaqla bir sıra respublikaçı siyasətçilərin tədbirdə iştirak edəcəyi bildirilib.
Təşkilatçılar qeyd ediblər ki, proqramın məqsədi ölkənin yubileyinə “dua, dini çağırış və milli birlik” ruhunda hazırlaşmaqdır.
Lakin bir sıra hüquq müdafiəçiləri və ictimai təşkilatlar tədbirin dövlətlə din arasındakı sərhədləri zəiflətdiyini bildiriblər.
"Freedom From Religion Foundation" təşkilatının həmsədri Annie Laurie Gaylor bu tədbiri “xristian millətçiliyi ilə dövlətin birləşməsi” kimi qiymətləndirib.
Tənqidçilər, həmçinin tədbirdə müsəlmanlar, buddistlər, hindular, pravoslavlar və digər dini qrupların təmsil olunmadığını vurğulayıblar.
Məlumata əsasən, ABŞ əhalisinin əhəmiyyətli hissəsi özünü hər hansı dini qrupa aid etmədiyini bildirir.
21:45 17.05.2026
Oxunuş sayı: 35
