EOSG: Yeni şəhər gündəliyinin nəzərdən keçirilməsi strateji fürsət təqdim edir
Yeni şəhər gündəliyinin nəzərdən keçirilməsi yerli hökumətlərin və yerli fəaliyyətin gücləndirilmiş cəlb edilməsi vasitəsilə çoxtərəfliliyi gücləndirmək üçün strateji fürsət təqdim edir.
Crossmedia.az xəbər verir ki, bunu BMT-nin Baş Katibinin İcraiyyə Ofisinin (EOSG) Siyasət üzrə baş katibin müavini Qay Bernard Rayder Bakıda WUF13 çərçivəsində keçirilən Yeni Şəhər Gündəliyi üzrə nazirlər görüşünə ünvanladığı video müraciətdə bildirib.
Onun sözlərinə görə, 10 il əvvəl üzv dövlətlər Kitoda Mənzil və Davamlı Şəhər İnkişafı üzrə BMT-nin 3-cü Konfransında Yeni Şəhər Gündəliyini qəbul ediblər: "Bu gündəlik üzv dövlətlər, BMT qurumları, siyasət ekspertləri, yerli və regional hökumətlər, özəl sektor və vətəndaş cəmiyyəti tərəfindən birlikdə formalaşdırılıb. Bu istiqamətə bütün fikirlər nəzərə alınıb. Bunun nəticəsi isə inklüziv, təhlükəsiz, davamlı və dayanıqlı olan şəhərlər və insan yaşayış məntəqələri üzərində hüquqa, ləyaqətə və inklüzivliyə əsaslanan ortaq baxışdır. Hazırda dünyada hər dörd nəfərdən biri qeyri-rəsmi yaşayış məntəqələrində və yaxud gecəqondularda yaşayır".
O əlavə edib ki, yeni şəhər gündəliyi məhz bu çağırışlara cavab vermək üçün qəbul edilib: "İndiyə qədər əldə edilmiş tərəqqini dəyərləndirməli və bu ortaq baxışı həyata keçirmək üçün siyasi impulsu yeniləməliyik. İki il əvvəl isə Gələcək Pakt yenilənmiş öhdəliklə bu ehtiyaca cavab verib. Onun 6-cı Fəaliyyəti çərçivəsində üzv dövlətlər hamı üçün adekvat, təhlükəsiz və əlçatan mənzilə çıxışı təmin etməyi və inkişaf etməkdə olan ölkələrə dayanıqlı və davamlı şəhərlərin planlaşdırılması və həyata keçirilməsində dəstək verməyi öhdələrinə götürdülər. Bu öhdəliklərin yerinə yetirilməsi bir neçə istiqamətdə fəaliyyət tələb edir. Daha güclü tərəfdaşlıqlar, effektiv çoxsəviyyəli idarəetmə, inkişaf üçün maliyyələşdirməyə, ölkələrə və şəhərlərə təkmilləşdirilmiş çıxış və məlumat, texnologiya, infrastruktur və potensiyala investisiya".
Q.B.Rayder vurğulayıb ki, Gələcək Paktı yerli və regional orqanların əsas rolunu vurğulayır, şəhərlərin gələcək risklərin və imkanların kəsişdiyi yer olduğunu qəbul edir.
09:58 17.05.2026
Oxunuş sayı: 46
