Magistraturaya qəbulunun ikinci cəhdində suallar asanlaşacaq?- Aydınləq gətirildi
Magistratura imtahanının birinci cəhdinin keçirilməsindən sonra bəz imtahan verənlər ikinci cəhdlə bağlı sualların çətinlik səviyyəsi barədə müxtəlif fikirlər səsləndirirlər. Bir qisim namizədlər ikinci cəhddə imtahanların daha asan, digərləri isə daha çətin ola biləcəyi ilə bağlı narahatlıq ifadə edirlər. Sosial müzakirələrdə tez-tez ikinci cəhdin ümumi formatının və səviyyəsinin dəyişib-dəyişməyəcəyi sual olunur. Xüsusilə imtahanların nəticələrə necə təsir edəcəyi və rəqabət balansının qorunub-qorunmayacağı məsələsi gündəmdə qalır.
Mövzu ilə bağlı Crossmedia.az-a açıqlama verən təhsil eksperti Rəşad Qardaşov isə bu fikirlə razı olmadığını və Dövlət İmtahan Mərkəzinin imtahanları hər zaman eyni formatda keçirdiyini bildirib: “Suallar üç kateqoriyada hazırlanır: asan, orta, çətin. Əgər 50 məntiq sualını kəmiyyət etibarilə vahid qəbul etsək, 10-15 arası çox asan suallar, yerdə qalanlar orta səviyyəli suallardır. İmtahanda hər zaman çətin sual olmalıdır ki, sözün xoş mənasında çətin sual olmalıdır ki, diskriminasiya apara bilək. Bu fərqləndirmə olmasa, bu zaman keçid balları arasında proporsionallıq, həmçinin tənasübün qorunması düzgün ola bilməz. Lakin ümumilikdə götürsək, ikinci cəhddə sualların asan olacağına dair fikri qəbul etmirəm".
R.Qardaşovun sözlərinə görə, birinci turda imtahan verən elə bakalavr olur ki, əziyyət çəkib, hazırlaşıb, universitet dərslərinə gedib, müstəqil seminar, mühazirə və müəyyən hazırlıqlara qatılıb və bu əziyyətin qarşılığını görüb: "Amma indi birdən-birə sualları hamısını asan səviyyəyə salsaq, bu, birinci turda imtahanda nəticə toplayan adamlara haqsızlıq olar. İnanıram ki, bu hər zaman belə olub, bundan sonra da belə olacaq. İkinci cəhddə, yəni ayın 17-də imtahan olacaq suallarda eynilə birinci cəhddə olan sualların görünüş və məzmun etibarilə interpretasiyası olacaqdır. Yəni həmin suallar formatında suallar salınacaqdır. 3-4 il bundan əvvəl ikinci cəhd yox idi, yalnız bir cəhd var idi. Artıq burada da bakalavrlar ikinci cəhddə özlərini daha da toparlamalı və birinci cəhddə olan həyəcan, stres və vaxtı düzgün bölməmək kimi problemlər ikinci cəhddə aradan qaldırılmalıdır”.
Müsahibimiz bildirib ki, ikinci cəhddə sualların səviyyəsinin birdən-birə aşağı düşməsi real görünmür və normal deyil: “Eynilə bu səviyyədə olan suallar müxtəlif formalarda və məzmunlarda düşəcək. Bakalavrların magistratura imtahanına hazırlaşması üçün kifayət qədər vaxt verilib, kifayət qədər məzmun var, sınaq imtahanları keçirilib, test materialları və test topluları var. Ətrafımızda kifayət qədər dərsxanalər, özəl kurslar, özəl müəllimlər vardır. Heç bir şey olmasa belə, YouTube platformasında, müxtəlif sosial şəbəkələrdə izahlı dərslər var. Onların hazırlaşa bilmələri üçün çox şəffaf və əlçatan bir şərait mövcuddur. Ümid edirəm ki, bu sahədə məqsəd qoyan bir adam iki ay bu sahə ilə məşğul olsa, lazım olan nəticəni toplaya biləcək”.
Fatimə Məmmədova
19:19 16.05.2026
Oxunuş sayı: 41
