Ərdoğan: ABŞ və İsrailin İrana zərbələri beynəlxalq hüquq pozuntusudur
Rəcəb Tayyib Ərdoğan ABŞ və İsrailin İrana endirdiyi zərbələri beynəlxalq hüququn aşkar pozulması kimi qiymətləndirib.
Crossmedia.az-ın türk mediasına istinadən verdiyi xəbərə görə, Türkiyə Prezidenti bildirib ki, prosesə zəruri müdaxilə olunmasa, münaqişə regional və qlobal təhlükəsizlik üçün ciddi nəticələr doğura bilər. Onun sözlərinə görə, yaranacaq iqtisadi və geosiyasi qeyri-müəyyənliyə heç bir ölkə tab gətirə bilməz.
“Yanğın daha da alovlanmazdan əvvəl söndürülməlidir”, – deyə Ərdoğan vurğulayıb.
Dövlət başçısı qeyd edib ki, İran Türkiyənin qonşusudur və İran xalqı 1639-cu ildən bəri sülh içində yaşadıqları “qardaş” xalqdır. “Biz əsrlər boyu yanaşı, sülh şəraitində yaşamışıq. İnşallah, iranlı qardaşlarımızla daha neçə əsrlər boyu sülh və əmin-amanlıq şəraitində yanaşı yaşayacağıq”, – deyə o əlavə edib.
Türkiyə Prezidentinin sözlərinə görə, Ankaranın əsas prioriteti atəşkəsin təmin edilməsi və dialoq üçün qapıların açılmasıdır.
00:30 03.03.2026
Oxunuş sayı: 350
