Avoneks sükutu: dağınıq skleroz xəstələri dərmanlarını niyə ala bilmirlər?
Azərbaycanda (DS) xəstələri artıq üç aydır ki, müalicə üçün həyati əhəmiyyət daşıyan “Avoneks” inyeksiyasını ala bilmirlər. Xəstələr dərmanın qiymətinin çox yüksək olmasını əsas gətirərək, onun özləri tərəfindən alınmasının mümkün olmadığını bildirirlər. Xəstəxanadan məsələ ilə bağlı aidiyyəti qurumlarla dəqiqləşdirmə aparıldığı bildirilsə də, hələlik konkret həll yolu yoxdur və xəstələrin vəziyyəti narahatlıq doğurur.
Məsələ ilə bağlı tibb elmləri doktoru, professor Adil Qeybulla Crossmedia.az-a bildirib ki, ümumiyyətlə, Avoneks genetik molekulyar biologiyanın son nailiyyətlərindən alınan preparatlar qrupuna aiddir və interferon beta-1 adlanır:
“Bu dərman dağınıq sklerozu müalicə etmək və xəstəliyin artmasının qarşısını almaq üçün istifadə olunur. Əslində, 2018-2022-ci illərdə dağınıq skleroz xəstələrinin müalicəsi və profilaktikası üzrə dövlət proqramı çərçivəsində təsdiq edilmişdi və prezident tərəfindən xəstələrə pulsuz verilməsi nəzərdə tutulmuşdu”.
Professor A.Qeybulla əlavə edib ki, ondan qabaq da bəzi mühüm dərmanlar müvafiq nazirlik əmri ilə nadir dərmanlar siyahısına daxil edilmişdi, lakin daha sonra dərmanların vətəndaşla dövlət arasında bölünməsi məsələsi ortaya çıxdı:
“Bu gün qəribə bir mənzərə yaranıb. Çox dərmanlar bazarda yoxa çıxır. Adi Dimedrol hazırda tapılmır, bir ara Prednizolon da çatışmırdı. Belə hallara çox rast gəlirik. Bu dərmanların dövlət tərəfindən gətirilməsi, dövriyyəsinə, saxlanmasına və utilizasiyasına nəzarət olunması daha məqsədəuyğundur. İndi problemlər var, amma dərmanın ölkəyə gətirilməsi vacibdir”.
Professor qeyd edib ki, dağınıq sklerozun müalicəsi üçün alternativ üsullar da mövcuddur:
“Məsələn, Mitoxantrone adlı kimyəvi preparat var və bu xəstəyə 3 il müddətində vurulur. Yəni alternativlər mövcuddur, lakin Avoneksin olmaması xəstələr üçün ciddi çətinlik yaradır”.
Mehriban Yariyeva
12:36 19.02.2026
Oxunuş sayı: 449
