Ermənistanda yeni hökumət: Xarici siyasətdə hansı dəyişikliklər gözlənilir?
Ermənistanda hökumətin istefası ilə siyasi proses yeni mərhələyə qədəm qoyur. Bu dəyişiklik formal konstitusion prosedur olsa da, yeni hökumətin tərkibi və fəaliyyət istiqamətləri həm ölkədaxili, həm də regiondakı proseslər baxımından diqqətlə izlənilir.
Mövzu ilə bağlı jurnalist Heydər Oğuz Crossmedia.az-a açıqlamasında bildirib ki, Ermənistan hökumətinin istefası adi konstitusion prosedurdur:
“Yeni parlament seçilib və həmin parlament öz yeni hökumətini formalaşdırmalıdır. Yeni hökumətin avqustun 2-də seçilməsi gözlənilir. Bu, tamamilə adi prosesdir
Burada əsas məsələ hökumətin tərkibində və Ermənistanın siyasətində hansı dəyişikliklərin baş verəcəyidir. Ermənistanın siyasətində Rusiya ilə mövcud hökumət arasındakı məsafənin daha da artdığını görəcəyik. Hökumətin prioritetləri dəyişəcək. İlk növbədə Rusiyayönümlü hökumətdən Türkiyəyönümlü hökumətə keçid müşahidə olunacaq. Hökumət daha çox Türkiyə ilə əlaqələr quracaq və fəaliyyətini Ankara ilə koordinasiyalı şəkildə davam etdirəcək”.
H.Oğuz qeyd edib ki, bunu parlamentin yeni sədri Ruben Rubinyanın seçilməsindən də görmək mümkündür:
“O, Türkiyəyə yaxınlığı ilə tanınan siyasətçidir. Bu da göstərir ki, yeni hökumətin prioritetləri arasında Türkiyə ilə daha yaxın münasibətlərin qurulması yer alacaq”.
H.Oğuz Paşinyanın son günlər verdiyi bəyanatlar, həmçinin Rusiya Prezidenti Vladimir Putinə ünvanladığı mesajların da bunu göstərdiyini vurğulayıb:
“Artıq hiss olunur ki, Ermənistan Rusiya ilə ticarət əlaqələrini tədricən dəyişməyə başlayacaq. Strateji və iqtisadi münasibətlərdə ciddi dəyişikliklər olacaq. Bu dəyişikliklər əsasən enerji sahəsində özünü göstərəcək. İndiyədək Rusiyadan qaz alırdılarsa, bundan sonra Azərbaycandan alacaqlar. Eyni zamanda atom elektrik stansiyasını artıq Amerika ilə birlikdə işlədəcəklər”.
Zərnigar Hüseynli
20:50 31.07.2026
Oxunuş sayı: 53
