MEK tərəfindən Səməd Vurğunun 120 illiyinə həsr olunmuş rəqəmsal məlumat bazası hazırlanıb
Bu gün Azərbaycan Yazıçılar Birliyinin (AYB) Səməd Vurğun adına Yaradıcılıq Evində AMEA alimlərinin “Elm, ədəbiyyat və sosial həyat” (“Fizika və lirika – IX”) adlı ədəbi-bədii tədbir keçirilib.
Crossmedia.az xəbər verir ki, AMEA, Azərbaycan Həmkarlar İttifaqları Konfederasiyası, AYB və Akademiyanın Azad Həmkarlar İttifaqının birgə təşkilatçılığı ilə keçirilən tədbir Azərbaycanın ilk Xalq şairi, görkəmli dramaturq, ədəbiyyatşünas, ictimai xadim, akademik Səməd Vurğunun 120 illiyinə həsr olunub.
Tədbirdə Səməd Vurğunun zəngin yaradıcılıq irsinin öyrənilməsi, tədqiqi və təbliği, eləcə də müasir rəqəmsal texnologiyalar vasitəsilə geniş auditoriyaya çatdırılması istiqamətində həyata keçirilən layihələrdən də bəhs olunub.
Tədbir zamanı AMEA Mərkəzi Elmi Kitabxanasının Rəqəmsal kitabxana və süni intellekt şöbəsinin müdiri, filologiya üzrə fəlsəfə doktoru Şəfəq Əliyeva MEK tərəfindən hazırlanmış Səməd Vurğunun 120 illiyinə həsr olunmuş rəqəmsal məlumat bazasını təqdim edib.
Bildirilib ki, Xalq şairi Səməd Vurğunun anadan olmasının 120 illik yubileyi münasibətilə AMEA-da həyata keçirilən genişmiqyaslı tədbirlərin davamı olaraq, AMEA prezidenti, akademik İsa Həbibbəylinin ideya müəllifliyi ilə Mərkəzi Elmi Kitabxanada görkəmli şairin zəngin həyat və yaradıcılığına həsr olunmuş yeni elektron resurs hazırlanıb.
Şəfəq Əliyeva qeyd edib ki, Mərkəzi Elmi Kitabxanada yaradılan xüsusi məlumat bazası məzmun zənginliyi, elmi və bədii tutumu baxımından müstəsna əhəmiyyət daşıyır. Məlumat bazasında Səməd Vurğunun müəllifi olduğu, eləcə də onun həyat və yaradıcılığına həsr edilmiş 100-ə yaxın kitab, 21 avtoreferat, 21 video və 109 fotoşəkil yerləşdirilib.
Həmçinin şairin əsərləri əsasında hazırlanmış 4 film və tamaşa, 96 məqalə, 27 tərcümə əsəri, 200-ə yaxın şeirinin PDF formatında elektron nüsxəsi, 6 sənədli-publisistik film və şeirləri əsasında bəstələnmiş 17 mahnı təqdim edilir. Məlumat bazasında, eyni zamanda, MEK əməkdaşı Nailə Əmiraslan tərəfindən səsləndirilmiş 32 audioşeir də yer alıb.
Şəfəq Əliyeva bildirib ki, yubiley çərçivəsində həyata keçirilən təşəbbüslər arasında Mərkəzi Elmi Kitabxananın hazırladığı rəqəmsal məlumat bazası Səməd Vurğunun çoxşaxəli yaradıcılığını kompleks şəkildə əks etdirməsi ilə xüsusi əhəmiyyət daşıyır.
O qeyd edib ki, layihənin əsas fərqləndirici cəhətlərindən biri onun elmi kitabxananın profilinə uyğun şəkildə formalaşdırılmasıdır. Belə ki, layihədə elm sahəsində çalışanlar, xüsusilə tədqiqatçılar üçün mühüm əhəmiyyət daşıyan materiallara xüsusi diqqət yetirilib və Səməd Vurğunun həyat və yaradıcılığı ilə bağlı aparılmış elmi tədqiqatların avtoreferatlarının rəqəmsallaşdırılması həyata keçirilib.
Vurğulanıb ki, avtoreferatların elektronlaşdırılması milli elmi irsin arxivlərdən çıxarılaraq müasir rəqəmsal mühitə qaytarılması baxımından mühüm addımdır. Hər bir avtoreferat alimin Azərbaycan elminə verdiyi töhfəni əks etdirir. Bu elmi materialların rəqəmsallaşdırılması yerli elmi potensialın beynəlxalq müstəvidə tanıdılmasına, elmi irsin gələcək nəsillərə itkisiz ötürülməsinə imkan yaradır.
Bununla “milli irsə bağlılıq” prinsipi müasir dövrün tələbləri ilə uzlaşdırılıb, milli irsin müasir texnologiyalar vasitəsilə rəqəmsallaşdırılması həyata keçirilib. Qloballaşma dövrünün imkanlarından istifadə edilərək elmi kitabxananın müasir informasiya məkanı ilə inteqrasiyasına töhfə verilib.
Şəfəq Əliyevanın sözlərinə görə, layihə Səməd Vurğunun əsərlərindən, alimlərin elmi əməyindən və süni intellektin imkanlarından istifadə etməklə milli kimliyin rəqəmsal dünyada tanıdılmasına yeni imkanlar açır. Bu təşəbbüs milli-mənəvi dəyərlərin müasir informasiya cəmiyyətində yaşadılması və gələcək nəsillərə ötürülməsi baxımından mühüm vasitədir.
Şəfəq Əliyeva bildirib ki, Mərkəzi Elmi Kitabxana Azərbaycanın elmi-ədəbi irsinin qorunması, rəqəmsallaşdırılması və qlobal rəqəmsal məkanla inteqrasiyası istiqamətində yeni mərhələyə qədəm qoyub.
20:12 31.07.2026
Oxunuş sayı: 52
