Xamenei ABŞ-yə xəbərdarlıq edib: Yeni hücuma daha geniş cavab veriləcək
İranın ali rəhbəri Müctəba Xamenei ABŞ-də keçirilən aralıq seçkilərin nəticələrinin Vaşinqtonun Tehrana qarşı siyasətini dəyişməyəcəyini bildirib.
Crossmedia.az xəbər verir ki, Müctəba Xameneinin açıqlamasında ABŞ-nin İrana qarşı mümkün yeni hərbi əməliyyatlarına da toxunulub.
Xamenei hesab edir ki, ABŞ-də hakim siyasi qüvvələrin dəyişməsinin Vaşinqtonun İrana münasibətinə təsir göstərəcəyini gözləmək yanlışdır.
Onun sözlərinə görə, güzəştlər yolu ilə ABŞ-nin İrana qarşı düşmənçilik siyasətindən imtina etməsinə nail olmağın mümkünlüyünə inanmaq da ciddi səhvdir.
İranın ali rəhbəri Fars körfəzində, xüsusilə Hörmüz boğazında baş verən hadisələrə diqqət çəkərək bunların ABŞ-nin hərbi toxunulmazlığı barədə təsəvvürləri sarsıtdığını iddia edib.
O, həmçinin təhlükəsizliyini xarici qüvvələrin dəstəyinə əsaslandıran hökumətlərin zəifliyinin üzə çıxdığını bildirib.
Xamenei xəbərdarlıq edib ki, ABŞ İrana qarşı hərbi əməliyyatları bərpa edərsə, Tehran əvvəlkindən daha genişmiqyaslı cavab verəcək.
Qeyd edək ki, İranın ali rəhbəri oktyabrın 31-də də ABŞ və İsrailin mümkün yeni hücumlarına coğrafi məhdudiyyət olmadan cavab veriləcəyini bəyan etmişdi.
14:42 04.11.2026
Oxunuş sayı: 59
