Rusiya büdcə kəsirini azaltmaq üçün iri şirkətlərin səhmlərini satışa çıxarır
Rusiya hökuməti dövlət büdcəsinə əlavə gəlir cəlb etmək məqsədilə ölkənin ən böyük gəmiçilik şirkəti olan “Sovkomflot”un səhmlərinin bir hissəsini satmağa hazırlaşır.
Crossmedia.az xəbər verir ki, “Reuters” agentliyi bu barədə məlumat yayıb.
Məlumata görə, hökumət “Sovkomflot”un səhmlərinin təxminən 7,8 faizini satışa çıxarmağı planlaşdırır.
İlkin hesablamalara əsasən, sövdələşmə dövlət büdcəsinə 15 milyard rubl (təxminən 184 milyon ABŞ dolları) gəlir gətirə bilər.
Hazırda şirkətin səhmlərinin 82,8 faizi dövlətə məxsusdur. Satışdan sonra bu göstərici 75 faiz və bir səhmə qədər azalacaq. Beləliklə, şirkət üzərində dövlət nəzarəti qorunacaq.
Qeyd edək ki, “Sovkomflot” Rusiyanın neft, neft məhsulları və mayeləşdirilmiş təbii qaz ixracında mühüm rol oynayan gəmiçilik şirkətidir.
Bundan başqa, Rusiya hökuməti Novorossiysk Dəniz Ticarət Limanının səhmlərinin 20 faizini, “Aeroflot” aviaşirkətinin isə 23,8 faizini satmağı planlaşdırır.
Şirkətlərin səhmlərinin qismən özəlləşdirilməsi Ukraynada davam edən müharibə fonunda Rusiyanın artan hərbi xərcləri və büdcə kəsiri ilə əlaqələndirilir.
Rusiya Maliyyə Nazirliyinin proqnozuna görə, 2026-cı ildə ölkənin büdcə kəsiri ümumi daxili məhsulun 3,2 faizinə çata bilər.
13:30 04.11.2026
Oxunuş sayı: 60
