Məktəb psixoloqlarının bacarıqları artırılmalıdır - PSİXOLOQ
Gənclər arasında psixi sağlamlıq son illərdə cəmiyyətin diqqət mərkəzində olan mühüm mövzulardan birinə çevrilib. Sosial media təsirləri, təhsil təzyiqləri və şəxsi həyatdakı çətinliklər gənclərin emosional vəziyyətinə mənfi təsir göstərir. Araşdırmalar göstərir ki, bu yaş qrupunda stress, depressiya və narahatlıq halları artmaqdadır. Erkən müdaxilə və dəstək sistemlərinin əhəmiyyəti vurğulanır, ailələr və məktəblər gənclərin psixi sağlamlığını qorumaq üçün daha diqqətli olmağa çağırılır.
Mövzu ilə bağlı psixoloq Elnur Rüstəmov Crossmedia.az-a açıqlamasında bildirib ki, gənclərin psixi sağlamlıq problemlərinin yaranmasında bioloji, sosial və psixoloji amillər böyük rol oynayır:
"Genetik meyillilik, hormonal dəyişikliklər, nevroloji problemlər və irsi yolla keçən xəstəliklər psixi sağlamlığa mənfi təsir göstərir. Eyni zamanda ailədaxili konfliktlər, ətrafın təsiri, özgüvən əskikliyi və motivasiya çatışmazlığı kimi sosial və psixoloji faktorlar da bu prosesə təsir edir. Bundan əlavə, müasir dövrdə internet və texnoloji cihazlara asılılıq, həddindən artıq informasiya yükü də psixi sağlamlığı zədələyir. Məişət zorakılığı, müharibə, təbii fəlakətlər kimi travmatik hadisələr də bu problemlərin yaranmasında rol oynayır. Bütün bu faktorlar birlikdə və ya ayrı-ayrılıqda gənclərin psixi sağlamlığına mənfi təsir edə bilər və hər biri diqqətlə araşdırılmalıdır".
Elnur Rüstəmov əlavə edib ki, psixi sağlamlığı qorumaq üçün tətbiq edilən müalicə üsulları problemin növünə görə dəyişir:
"Biz bu prosesdə psixoterapiya, ailə terapiyası, qrup terapiyası, medikamentoz müalicə, meditasiya, idman, yoqa və art terapiya kimi müxtəlif metodlardan istifadə edə bilərik. Bu üsullar problemin spesifikasına uyğun seçilir. Ən vacib addım isə maarifləndirmə işlərinin həyata keçirilməsidir. Bu cəmiyyətin bütün sahələrində - xüsusən də məktəblərdə geniş miqyasda tətbiq edilməlidir. Məktəblərdə psixi sağlamlıq mövzularında seminarlar keçirmək, şagirdlər və müəllimlər üçün emosiyaların idarə edilməsi üzrə təlimlər təşkil etmək və zorakılığın qarşısını almaqla bağlı seminarlar keçirmək böyük əhəmiyyət kəsb edir. Bu işin müvəffəqiyyəti üçün məktəb psixoloqlarının peşəkar bacarıqlarının artırılmasına xüsusi diqqət yetirilməlidir. Bundan əlavə, valideynlər də maarifləndirilməlidir, çünki onların bu prosesdə rolu mühümdür".
Psixoloq vurğulayıb ki, uşağın problemini ilk növbədə valideynlər görür:
"Sonrakı mərhələdə müəllimlər və cəmiyyət də maarifləndirilməlidir. Psixoloji dəstək almağa mane olan stiqmanın aradan qaldırılması üçün geniş işlər görülməlidir. Stiqma səbəbindən bəzən həm valideynlər, həm də uşaqlar psixoloji dəstək almaqdan imtina edirlər. Buna görə də cəmiyyətin maarifləndirilməsinə xüsusi diqqət yetirilməlidir. Xüsusilə sosial media və internet resurslarında geniş miqyasda məlumatlandırma işləri aparılmalıdır".
Nərgiz Orucova
13:00 02.12.2024
Oxunuş sayı: 23546
