Türkiyənin müdafiə sənayesindəki uğuru Yunanıstanda təşviş yaratdı
Türkiyənin müdafiə sənayesində sürətli yüksəlişi Afinada və Cənubi Kiprdə narahatlıq doğurub. Avropa İttifaqı strateji müstəqillik axtarışında pilotsuz uçuş aparatları və zenit sistemləri üçün Türkiyəyə üz tutub. Bu addım Yunan mediasında “Avropa kritik sahələrdə Türkiyə müdafiə sənayesindən asılı vəziyyətə düşə bilər” başlıqları ilə dərc olunub.
Crossmedia.az "CNN"ə istinadən xəbər verir ki, Yunan mətbuatında yayılan xəbərlərdə Avropanın Ukrayna müharibəsi, enerji asılılığı və miqrasiya dalğaları ilə zəif tərəflərinin üzə çıxdığı vurğulanıb. Məqalələrdə Türkiyə ilə əməkdaşlığın Yunanıstan və Egey bölgəsində təhlükəsizlik risklərini artıra biləcəyi qeyd olunub.
Bununla yanaşı, xəbərlərdə “Türkiyə–AB əməkdaşlığı Avropanın strateji müstəqillik hədəflərinə töhfə verə bilər” ifadəsi də diqqət çəkib. Yerli və milli müdafiə sənayesinin aparıcı şirkətlərindən Baykarın İHA texnologiyaları, müasir raket sistemləri və yeni nəsil hava hücumundan müdafiə layihələri ilə Ankaranın “regional güc mərkəzinə” çevrildiyi vurğulanıb.
Mütəxəssislər Ankaranın gələcəkdə Avropanın təhlükəsizlik arxitekturasını formalaşdıracaq əsas oyunçulardan biri ola biləcəyini bildirirlər.
20:39 13.09.2025
Oxunuş sayı: 682
