13 ölkədən səyyahlar Şuşaya gəldi
Dünya şöhrətli MTP (Most Traveled People) beynəlxalq səyyahlar klubunun 40 nəfərlik heyəti Qarabağ və Şərqi Zəngəzura səfər çərçivəsində Şuşada olub.
Crossmedia.az xəbər verir ki, MTP klubunun təsisçisi, amerikalı Çarlz Vili (Charles Veley) tərəfindən rəhbərlik olunan səyyahlar əvvəlcə Şuşanın mərkəzi meydanında Azərbaycanın tanınmış şəxsiyyətləri Natəvan, Bülbül və Üzeyir Hacıbəylinin güllələnmiş heykəlləri ilə tanış olublar.
Qonaqlara Şuşanın tarixi, şəhərin işğal dövründəki vəziyyəti, həmçinin 2020-ci ildə işğaldan azad edildikdən sonra həyata keçirilən bərpa və yenidənqurma işləri barədə məlumat verilib.
Səyyahlara bildirilib ki, 30 illik işğal dövründə Şuşanın tarixi binaları, məscidləri və digər mədəniyyət abidələri dağıntı və vandalizmə məruz qalıb. Şəhərin azad edilməsindən sonra isə tarixi-mədəni irsin və Şuşanın tarixi simasının bərpası istiqamətində genişmiqyaslı layihələr həyata keçirilir.
Beynəlxalq səyyahlar səfər zamanı Aşağı Gövhər Ağa məscidini, Sadıqcanın ev-muzeyini, Xurşidbanu Natəvanın evini, Xan qızı bulağının yerləşdiyi ərazini və Şuşanın qala divarlarını ziyarət ediblər.
Səfərin sonunda qonaqlar Cıdır düzünə gedərək buradan Şuşanın mənzərəsini seyr ediblər.
Qeyd edək ki, bu, dünyanın müxtəlif səyyah klublarının 2021–2026-cı illərdə Qarabağ və Şərqi Zəngəzura qrup şəklində təşkil etdiyi 17-ci səfərdir. Bu səfərlər beynəlxalq səyyahlara işğaldan azad edilmiş ərazilərdə aparılan bərpa və quruculuq işləri ilə yerində tanış olmaq imkanı yaradır.
13:37
13 ölkədən olan beynəlxalq səyahətçilərin Şuşa şəhərinə səfəri başlayıb.
Crossmedia.az xəbər verir ki, ABŞ, Kanada, Fransa, Almaniya, İsveçrə və Böyük Britaniya da daxil olmaqla 13 ölkədən olan səyyahlar Şuşada ilk olaraq İsa bulağını ziyarət ediblər.
Səyyahlara İsa bulağının yerləşdiyi ərazi, Şuşanın tarixi və təbiəti barədə məlumat verilib.
Səfər çərçivəsində beynəlxalq səyahətçilərin Şuşanın digər tarixi və mədəni məkanlarını da ziyarət etmələri nəzərdə tutulur.(Apa)
13:37 08.10.2026
Oxunuş sayı: 402