Putin Zelenskinin legitimliyini şübhə altına alaraq Ukrayna ilə sülh danışıqlarını imkansız adlandırıb
Rusiya prezidenti Vladimir Putin hazırkı Ukrayna hakimiyyətini “qanunsuz” hesab etdiyini bildirib. O, Ukrayna hökuməti ilə sülh sazişi bağlamanın mümkün olmadığını düşünür.
Crossmedia.az xəbər verir ki, bu barədə Müharibə Araşdırmaları İnstitutu (ISW) tərəfindən hazırlanmış analizdə qeyd olunur.
İnstitut yazır ki, Putinin adət etdiyi üslubda verdiyi açıqlamada o, Ukrayna Prezidenti Volodimir Zelenskinin legitimliyini şübhə altına aldığını bildirib. Bundan əlavə, Rusiya prezidenti hazırkı Ukrayna hakimiyyəti ilə sülh sazişi bağlamağın mümkün olmadığını vurğulayaraq ciddi danışıqların aparılmasının mümkünlüyünü faktiki olaraq istisna edib.
Putin Ukrayna ilə danışıqların “mənasız” olduğunu bildirib. O, bunun səbəbini Kiyev ilə razılaşma əldə etməyin “imkansız” olması ilə izah edib. Eyni zamanda Putin yeni tələblər irəli sürüb. Hətta sülh sazişi imzalanarsa, Ukrayna hərbi vəziyyəti ləğv etməli, prezident seçkiləri keçirməli və sonra razılaşmaları təsdiqləmək üçün “ümumxalq referendum”u təşkil etməlidir.
ISW analitikləri xatırladır ki, Putin və Kremlin digər nümayəndələri Zelenskinin legitimliyini dəfələrlə şübhə altına qoyublar və Ukrayna Konstitusiyasının normalarını qəsdən təhrif ediblər. Ekspertlərin fikrincə, bu açıqlamalar Putinin strategiyasının bir hissəsidir. Bu, Zelenski və Ukrayna rəhbərliyini sülh müqaviləsi bağlamaq mümkün olmayan tərəfdaş kimi təqdim etməkdir.
ISW-nin qiymətləndirməsinə görə, beləliklə, Putin müharibənin dayandırılması üzrə məzmunlu danışıqlara maraqsız olduğunu bir daha göstərib və danışıqları gecikdirmək, yaxud uzatmaq niyyətini açıqlayıb. Onun açıqlamaları həmçinin Rusiyanın danışıqlardan ümumiyyətlə imtina etməsini əsaslandırmaq cəhdi olub və danışıqların pozulmasına görə günahı Ukraynanın üzərinə atıb.
Niyaz Hacıyev
14:39 06.09.2025
Oxunuş sayı: 904
