8-ci Beynəlxalq Tibb və Sağlamlıq Elmləri Konqresi keçirilir
Azərbaycan Milli Elmlər Akademiyasının (AMEA) Mərkəzi Elmi Kitabxanasında Elm və Təhsil Nazirliyinin akademik Abdulla Qarayev adına Fiziologiya İnstitutunun və Türkiyənin İqtisadi İnkişaf və Sosial Tədqiqatlar İnstitutunun (İKSAD) birgə təşkilatçılığı ilə hibrid formatda 8-ci Beynəlxalq Tibb və Sağlamlıq Elmləri Elmi-Praktik Konqresi işə başlayıb.
AMEA-dan Crossmedia.az-a bildirilib ki, beynəlxalq tədbir Vətən müharibəsində Qələbənin 5-ci ildönümünə həsr olunub və konqresin elmi mövzusu təbii faktorların tibbi praktikada istifadəsinə aiddir. Konqresdə 20 ölkədən 200-dən çox nümayəndə iştirak edir.
Tədbiri açan AMEA-nın prezidenti akademik İsa Həbibbəyli bildirib ki, belə konqreslər yaşıl iqtisadiyyat, yaşıl iqtisadi zonanın daha da genişlənməsinə, sağlamlığımızın rifahına xidmət edir. Həmçinin vurğulayıb ki, müalicəvi Naftalan nefti, 1500 növ müalicəvi bitki resursları, mineral sular, Duzdağ kimi zəngin təbii resurslara malik olan Azərbaycan üçün bu faktorların tibdə istifadəsinin elmi əsaslarının işlənməsi ölkəmizdə prioritet məsələlərdəndir.
“Ölkəmizdə Naftalan Müalicə Sağlamlıq Mərkəzi yenidən qurulub. Dünyada yeganə çəlik, əsa muzeyi Naftalandadır. Həmçinin Duzdağ Fizioterapiya Sağlamlıq Mərkəzi yenidən qurulub. Bütün bunlar öz insanlarının sağlamlığını qoruyan dövlətimizin vətəndaşları qarşısında növbəti bir addımı və yeniliyidır. Əminik ki, bu yeniliklərlə təbii resursların tibb sahəsində tətbiqi aydın bir təfəkkürə xidmət edəcək”, - deyə akademik İsa Həbibbəyli söyləyib.
Daha sonra tədbirdə Elm və Ali Təhsil üzrə Dövlət Agentliyinin nümayəndəsi İltifat İbrahimov, İKSAD-ın Azərbaycan üzrə baş direktoru Əlvan Cəfərov, AMEA-nın müxbir üzvü Elşad Qurbanov, Türkiyənin İnönü Universitetinin Əczaçılıq fakültəsinin professoru İsmət Yılmaz, Çindən “Lingren Group”un sədri Li Zhang, onlayn formatda Pekin Universitetindən Liu Tingfang çıxış edərək konqresin əhəmiyyətindən danışıblar.
Konqresin əsas təşkilatçılarından olan Fiziologiya İnstitutunun direktoru professor Ulduz Həşimova bildirib ki, Azərbaycan təbii bitkilərlə zəngin ölkədir. Bu bitkilərdən istifadə etmək, onun müalicəvi əhəmiyyətini daha dərindən araşdırmaq, tədqiq etmək alimlərin üzərinə böyük məsuliyyət qoyur: “Bu gün bizdə olan müalicəvi bitkilərin, Naftalan neftinin, duzların istifadəsi üçün onların hüceyrə səviyyəsində təsirlərini öyrənməli, fiziki və kimyəvi xüsusiyyətlərini dərindən araşdırmalı, fayda və ziyanlarını müəyyənləşdirməliyik”.
Professor qarşıda böyük və məsuliyyətli işlərin dayandığını, əhalinin sağlamlığının qorunmasının əsas prioritetlərdən olduğunu söyləyib, tədbirin işinə uğurlar arzulayıb.
Beynəlxalq elmi-praktik konqres 20 bölmə iclasında işini davam etdirib. Xərçəngin erkən diaqnostikası, biotibbi materialların inkişafı, neyrodegenerativ xəstəliklər, ictimai səhiyyə modelləri və süni intellektin tibb sahəsinə tətbiqinə dair geniş müzakirələr aparılıb.
Tədbirə avqustun 29-da yekun vurulacaq.
14:08 28.08.2025
Oxunuş sayı: 899
