“Yüksək bal toplayıb qəbul ola bilməyən abituriyent məsələyə qeyri-ciddi yanaşır”- Ekspert
Dövlət İmtahan Mərkəzinin məlumatına görə, bu il 600-dən yuxarı bal toplayan 10 abituriyent ixtisas seçimində yalnız müəyyən sahəni göstərdiklərinə görə ali məktəblərə qəbul ola bilməyib. DİM bildirir ki, bu halda onlara güzəşt tətbiq edilmir və abituriyentlər ya boş plan yerlərində iştirak edə, ya da növbəti il yenidən imtahan verə bilərlər.
Bu hal göstərir ki, yüksək bal toplamaq təkbaşına qəbul üçün kifayət etmir, düzgün seçim də həlledici amildir. Abituriyentlərin yalnız istədikləri ixtisası yazması onların riskini artırır. Daha real yanaşma ilə alternativ ixtisasları da nəzərə almaq vacibdir.
Mövzu ilə bağlı təhsil eksperti Elçin Əfəndi Crossmedia.az-a açıqlama verib.
O, abituriyentlərə müsabiqədə iştirak etmək haqqı və seçim şansları verilibsə, onların da düzgün seçim etməli, düzgün qərar qəbul etməli olduqlarını bildirib:
“DİM tərəfindən müvafiq olaraq hər il keçirilən qəbul imtahanlarında müsabiqəyə buraxılan abituriyentlər mövcud plan yerləri əsasında seçimlərdə iştirakı təmin edilir. Bu, bir növ marafona bənzəyir: kim öndə qaçırsa, qalib də o olur. Yüksək bal toplayan, aşağı bal toplayan və yaxud da orta nəticə göstərən istənilən abituriyentin ixtisas seçmə imkanı tam təmin olunur. Və o abituriyentlər də mövcud dəyərləndirmə aparmaqla, plan yerlərini müqayisə etməklə, digər vacib elementlərə diqqət yetirməklə həmin o 15 yeri mütləq qeyd etməlidirlər.
İstisna hallarda, kimsə ən yüksək nəticə əldə edərsə (700 bal və ya 690+ bal), həmin abituriyent bir neçə yer qeyd etməklə kifayətlənə bilər. Amma yüksək bal toplayıb (550–600+ bal) heç bir yerə qəbul ola bilmirsə, bu, abituriyentin məsələyə qeyri-ciddi yanaşmasından irəli gəlir. Belə hallar abituriyentin daha az məlumat sahibi olması, mütəxəssislərlə fikir mübadiləsi aparmamasının nəticəsidir.
Yəni yüksək bal toplayıb bir abituriyent hüquqda oxumaq istəyirsə və ya tibbdə oxumaq istəyirsə, həmin il faktiki bal uyğun olmursa, həmin abituriyent başqa bir universitetdə həmin ixtisası oxuya bilər və ya əyani oxuya bilmirsə, ixtisasın qiyabi formada təhsilini ala bilər. Lakin belə də olmasa, məcburdur gələn il bir daha imtahan versin.
Ümumiyyətlə, DİM onlara seçim imkanı güzəştini etməməlidir. Onlara müsabiqədə iştirak etmək haqqı və seçim şansları verilirsə, abituriyent də burada düzgün seçim etməli, düzgün qərar qəbul etməli idi”.
Nicat Rüstəmzadə
18:55 26.08.2025
Oxunuş sayı: 768
