Ağciyər Xəstəlikləri Mərkəzinin Şəmkir Regional Xəstəxanasının açılışı olub
TƏBİB-in tabeliyində fəaliyyət göstərən Ağciyər Xəstəlikləri Mərkəzinin Şəmkir Regional Xəstəxanasının açılışı olub.
Bu barədə Crossmedia.az-a TƏBİB-dən məlumat verilib.
Şəmkir Regional Xəstəxanasında yaradılan şərait barədə məlumat verən Ağciyər Xəstəlikləri Mərkəzinin direktoru Nəhmət Rəhmanov bildirib ki, burada ağciyərin spesifik və qeyri spesifik xəstəliklərinin diaqnostikası, ambulator və stasionar müalicəsi, o cümlədən vərəmlə mübarizə sahəsində profilaktik tədbirlərin həyata keçirilməsi üçün bütün lazımi şərait yaradılıb.
Şəmkir Regional Xəstəxanasında Gəncə və Naftalan şəhərləri, eləcə də Qazax, Ağstafa, Tovuz, Şəmkir, Gədəbəy, Daşkəsən, Göygöl, Samux və Goranboy rayonları daxil olmaqla, ümumilikdə 2 şəhər və 9 rayon üzrə vətəndaşlara tibbi xidmətlər göstəriləcək. 2,5 hektar ərazini əhatə edən xəstəxanada 207 nəfərlik işçi heyət fəaliyyət göstərəcək.
Tibb müəssisəsinin strukturuna Təcili yardım bölməsi, Ambulator şöbə, 100 çarpayılıq 5 stasionar şöbə, inzibati və təsərrüfat şöbələri və eləcə də digər köməkçi sahələr daxildir.
Şüa-diaqnostika şöbəsi rəqəmsal rentgenoqrafiya, rəqəmsal flüoroqrafiya və son model ultrasəs müayinə (USM) avadanlıqları, Laboratoriya isə klinik-diaqnostik, həmçinin mikobakterioloji müayinələrin aparılması üçün bütün zəruri avadanlıqlarla təchiz edilib.
Təcili yardım şöbəsində pasiyentlər ilkin mərhələdə yaşıl, sarı və qırmızı sahələrdə tibbi yardım aldıqdan sonra vəziyyətlərinə uyğun olaraq evə və ya ixtisaslaşmış şöbələrə yönləndiriləcək.
Müasir tibbi avadanlıqlarla təchiz olunmuş Cərrahiyyə şöbəsində cərrahi xidmətlərin göstərilməsi təmin ediləcək. Əməliyyatxana bölməsi ən müasir cərrahi avadanlıqlarla təmin olunub və burada yüksək səviyyədə steril şərait yaradılıb.
Həyati funksiyaları pozulmuş və yaşaması risk altında olan, xüsusi baxım tələb olunan şəxslərə Reanimasiya və intensiv terapiya bokslarında xidmət göstərilir.
15:14 04.08.2025
Oxunuş sayı: 8654
