Alim: "Yunan, latın, akkad dilini öyrənmək üçün xüsusi ixtisaslar əlavə edilməlidir"
Müasir dövrdə Azərbaycan dili və onun ədəbi formalarının elmi əsaslarla tədqiqi strateji əhəmiyyət daşıyır. Lakin bu sahədə çalışan mütəxəssislərin sayında ciddi çatışmazlıq müşahidə olunur. Bu isə dilçilik elminin gələcək inkişafı üçün təhlükə yaradır. Problemə səbəb kimi doktoranturaya qəbul zamanı ingilis dili üzrə yüksək keçid balı tələb olunması göstərilir. Nəticədə Azərbaycan dili üzrə ixtisaslaşmaq istəyən bir çox gənc mütəxəssis təhsilini davam etdirə bilmir və mövcud boş yerlər dolmur. Bu reallıq Azərbaycan dilinin dərin elmi öyrənilməsi və təbliği baxımından daha çevik və əlçatan yanaşmalara ehtiyac olduğunu ortaya qoyur.
Mövzu ilə bağlı Nazirlər Kabineti yanında Terminologiya Komissiyasının sədr müavini Sayalı Sadıqova Crossmedia.az-a açıqlama verib:
“Ədəbi dil tarixini yetərincə tədqiq edən mütəxəssis yoxdur. Qədim dilləri bilən mütəxəssislərimizin olması vacibdir. Bu gün Şumer dilini, Akkad dilini tədqiq edən barmaq hesabı qədər mütəxəssisimiz belə yoxdur. Tarixi köklərimiz haqqında olan absurd fikirləri təkzib etmək üçün tutarlı arqumentlər lazımdır. Bunun üçün də bu dilləri öyrənmək, tədqiq etmək lazımdır. Milli Elmlər Akademiyasında magistratura pilləsi açılmışdı. Orada yunan, latın və erməni dili ilə bağlı mütəxəssislər yetişdirilirdi. Hazırda latın və yunan dilini tədqiq edən bir mütəxəssisimiz var. Ancaq son dövrlərdə AMEA-da magistratura pilləsi ləğv olunub. Onlar birbaşa bizə gəlir və iki il ərzində 3-3 mütəxəssiz qəbul olur. Hazırda onlar doktoranturada təhsil alırlar və bu sahədə tədqiqat aparırlar. Ona görə ilk növbədə magistratura pilləsində yunan, latın, akkad dilini öyrənmək üçün xüsusi ixtisaslar əlavə edilməlidir. Son dövrlərdə görürük ki, uzaq şərq dilləri ilə bağlı mütəxəssislər hazırlanır".
O bildirib ki, Azərbaycan tarixinin köklərini dəqiq tədqiq etmək üçün mütəxəssislər hazırlanmalıdır: "Mütəxəssislər ilk növbədə dil bilməlidirlər ki, tədqiqat da aparsınlar. Məsələn yunan mənbələri var ki, orada Azərbaycan dilinin tarixi köklərinin çoxu barədə Strabon, Pluton məlumat verir və qədim mənbələrdə öz əksini tapır. Buna görə də kadrlar hazırlanmalı, tədqiqat aparılmalıdır”.
Ayhan
16:42 02.08.2025
Oxunuş sayı: 8124
