Deputat: “Ermənistan cəzalandırılmalı və konpensasiya ödəməlidir”
Minalar həm insanlar, həm də heyvanlar üçün təhlükə yaratmağa davam edir.
Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev X sosial şəbəkəsindəki hesabında yazıb ki, minalar həm insanlar, həm də heyvanlar üçün təhlükə yaratmağa davam edir.
"Bu dəfə Kəlbəcər dağlarında Ermənistanın işğal dövründə quraşdırdığı piyada əleyhinə minanın qurbanı it olub. Xoşbəxtlikdən, Azərbaycan hərbi həkimlərinin operativ müdaxiləsi onun həyatını xilas edib", - Hacıyev yazıb.
O vurğulayıb ki, 2020-ci ildən bəri Ermənistanın quraşdırdığı minaların qurbanı 400-dən çox Azərbaycan mülki şəxsi və hərbçisi olub. "Bundan əlavə, illər boyu torpağın altında qalan minalar torpaq eroziyasına səbəb olur və yerli bitki örtüyünü məhv edir", - o əlavə edib.
İkinci Qarabağ müharibəsinin üzərindən bir neçə il keçməsinə baxmayaraq, Ermənistan hələ də Azərbaycan üçün təhdid yaradır. Belə ki, işğal dövründə basdırılan minalar müntəzəm olaraq azərbaycanlılar arasında itkilərə səbəb olur. Ermənistanın minalı ərazilərin xəritəsini rəsmi Bakıya təhvil verməməsi isə vəziyyəti daha da mürəkkəbləşdirir.
Ermənistanın davam edən mina terroru barədə Crossmedia.az-a danışan Milli Məclisin deputatı Aydın Hüseynov söyləyib ki, Ermənistanın Azərbaycana vurduğu ziyanın bir hissəsi milyard dollarlarla ölçülür: “Bu ziyanın həcmi beynəlxalq ekspertlərlə müəyyənləşdirilib. Eyni zamanda bütün bunlara baxmayaraq, Ermənistan minalı ərazilərin dəqiq xəritəsini də verməyib. İndiyə qədər bizim xeyli sayda hərbiçilərimiz, mülki şəxslərimiz minaya düşərək həlak olub, əlil qalıb. Buna görə Ermənistan cəzalandırılmalı və konpensasiya ödəməlidir”.
Ayhan
23:30 31.07.2025
Oxunuş sayı: 1769
