Rusiya Ukraynada həbsxanaya hava zərbəsi endirib: 17 ölü, 42 yaralı
Rusiya ordusunun Ukraynanın cənub-şərqində, cəbhə bölgəsində yerləşən həbsxanaya endirdiyi hava zərbəsi nəticəsində azı 17 nəfər həlak olub, 42 nəfər yaralanıb. Bu barədə Ukrayna rəsmiləri məlumat veriblər.
Crossmedia.az “BBC”-yə istinadən xəbər verir ki, zərbə gecə saatlarında Zaporojye vilayətində həyata keçirilib. Regionun qubernatoru İvan Fedorovun sözlərinə görə, Rusiya qüvvələri yüksək partlayıcı gücə malik planlaşdırılan hava bombalarından istifadə edərək ümumilikdə səkkiz zərbə endirib. Nəticədə təkcə həbsxana deyil, ətrafdakı yaşayış evləri də zərər görüb.
Ukrayna Prezidenti Volodimir Zelenski Rusiya tərəfini “islahedici müəssisənin ərazisinə qəsdən zərbə endirməkdə” ittiham edərək bildirib ki, Moskva atəşkəsin çoxdan əldə oluna biləcəyi bir vaxtda ukraynalıları qətlə yetirir.
Qeyd edək ki, Zaporojye vilayəti 2022-ci ildən etibarən Rusiya tərəfindən ilhaq edildiyi iddia edilən dörd şərq regionundan biridir. Buna baxmayaraq, vilayətin əksər hissəsi hələ də Ukraynanın nəzarətindədir.
Nicat Rüstəmzadə
14:52 29.07.2025
Oxunuş sayı: 8454
