Rusiya və Ukrayna arasında yeni görüş üçün gizli danışıqlar aparılır
Rusiya və Ukrayna nümayəndə heyətləri arasında yeni rəsmi görüşün keçiriləcəyi yerin müəyyənləşdirilməsi istiqamətində gizli danışıqlar gedir. Bu barədə Rusiya mediası İstanbuldakı diplomatik mənbəyə istinadən məlumat yayıb.
Crossmedia.az xarici mediaya istinadən bildirir ki, hazırda danışıqlar pərdəarxasında davam edir, lakin konkret razılaşma əldə olunmayıb. Diplomatik mənbəyə görə, İstanbul bu cür müzakirələr üçün həm coğrafi, həm də neytral status baxımından əlverişli platforma hesab olunur. “İstanbul, təbii ki, əlverişli, sınaqdan çıxmış və artıq özünü sübut etmiş danışıqlar meydançasıdır” – deyə məlumatda bildirilir.
Qeyd edək ki, mayın 16-da İstanbulda Rusiya və Ukrayna nümayəndələrinin 2022-ci ildən bəri ilk birbaşa görüşü baş tutub. Görüş zamanı tərəflər arasında bir sıra humanitar və siyasi məsələlər müzakirə olunub. Danışıqlardan sonra Rusiya nümayəndə heyətinin rəhbəri, prezidentin köməkçisi Vladimir Medinski bildirib ki, Moskva aparılan müzakirələrdən “razı qalıb”. Tərəflər “1000-ə 1000” formatında əsir mübadiləsinin aparılması barədə ilkin razılıq əldə ediblər. Ukrayna nümayəndə heyəti isə dövlət başçılarının birbaşa görüşməsi ilə bağlı təklif irəli sürüb və Rusiya bu müraciəti “nəzərə alındığını” qeyd edib.
Bəzi beynəlxalq müşahidəçilər bu cür təmasları münaqişənin diplomatik həllinə doğru atılmış ehtiyatlı, lakin vacib addımlar kimi dəyərləndirirlər. Hər iki tərəfin müharibənin gedişində danışıqlara üstünlük verməyə başlaması gələcəkdə atəşkəs və sülh sazişi istiqamətində irəliləyiş üçün əsas yarada bilər. Diplomatik proseslərin yenidən canlanması beynəlxalq ictimaiyyətin də diqqət mərkəzindədir.
Fatimə Nəbiyeva
09:38 26.05.2025
Oxunuş sayı: 1748
