Fransanın müvəqqəti işlər vəkili İran XİN-ə çağırıldı
Fransanın Tehrandakı müvəqqəti işlər vəkili İran Xarici İşlər Nazirliyinə çağırılıb.
Bu barədə Crossmedia.az İran mətbuatına istinadla xəbər verir.
Fransa xarici işlər naziri Jan-Noel Barrotun iranlı rejissor Cəfər Pənahinin Kann Film Festivalında “Qızıl Palma budağı” mükafatı alması ilə bağlı səsləndirdiyi fikirlər Tehranda narazılıq yaradıb.
Nazir “X” sosial platformasında yayımladığı açıqlamasında Pənahinin mükafatını “İran rejiminin repressiyalarına qarşı müqavimət simvolu və azadlıq mübarizəsinə ümid” adlandırıb.
İran XİN-in Qərbi Avropa üzrə İkinci Departamentinin rəhbəri Məhəmməd Tənhai fransalı nazirin bəyanatına kəskin münasibət bildirib:
“Fransa bu cür çıxışlarla mədəni tədbirləri siyasi təzyiq alətinə çevirir. Bu, ölkəmizin daxili işlərinə açıq müdaxilədir və siyasi qərəzin göstəricisidir”, – deyə o bildirib.
Fransanın müvəqqəti işlər vəkili isə məsələyə dair narahatlığın rəsmi Parisə çatdırılacağını vurğulayıb.
Qeyd edək ki, tanınmış iranlı rejissor Cəfər Pənahi siyasi mövqeyinə və sərt tənqidi filmlərinə görə son illər ərzində dəfələrlə saxlanılıb və beynəlxalq aləmdə simvolik azadlıq simasına çevrilib.
00:32 26.05.2025
Oxunuş sayı: 8985
