Hamburqda bıçaqlı hücumdan sonra təhlükəsizlik tədbirləri gücləndirildi
Almaniyanın Hamburq şəhərində baş vermiş bıçaqlı hücumun ardından Mərkəzi Qatar Stansiyasında sərnişinlər üzərində axtarış aparılıb, üzərində bıçaq, silah və ya spirtli içki olan şəxslər barədə tədbir görülüb.
Crossmedia.az Almaniya mətbuatına istinadən xəbər verir ki, hadisə yerli vaxtla saat 18:05-də bir qadının qatar gözləyən sərnişinlərə təsadüfi şəkildə hücum etməsi ilə baş verib. Hücumda 4-ü ağır olmaqla 18 nəfər yaralanıb, yaralıların müalicəsi davam edir.
Alman polisi, Alman Dövlət Dəmir Yolları (Deutsche Bahn) və özəl şirkət Hochbahn-ın təhlükəsizlik əməkdaşları Hamburg Mərkəzi Qatar Stansiyasında silah, bıçaq və alkoqol yoxlaması həyata keçirib. Axtarışlar zamanı 1 oktyabr 2023-cü ildən etibarən tətbiq edilən silah daşıma qadağasına məhəl qoymayan şəxslər barədə hüquqi tədbirlər görülüb.
Alman mediasında yayılan məlumatlara görə, hücum edən şəxsin psixoloji problemləri olduğu və bir neçə gün əvvəl psixiatriya mərkəzində müalicə aldığı qeyd olunub.
Hadisənin ardından 350 polis, 60 federal polis əməkdaşı (Bundespolizei), 50 yanğınsöndürən və təcili tibbi yardım işçisi ilə 20 Alman Qırmızı Xaçı Kriz Müdaxilə Qrupundan ibarət ümumilikdə 480 nəfərlik heyətin iştirakı ilə genişmiqyaslı əməliyyat başlanılıb. Hücumdan sonra hadisə yeri müvəqqəti olaraq bağlanıb və məhkəmə ekspertizası aparılıb. Hücum edən şəxsin 39 yaşlı Almaniya vətəndaşı bir qadın olduğu müəyyənləşdirilib. O, hadisə yerində iki sərnişinin müdaxiləsi ilə zərərsizləşdirilərək Federal Polis, Deutsche Bahn və Hochbahn təhlükəsizlik əməkdaşlarından ibarət 4 nəfərlik qrup tərəfindən saxlanılıb.
Almaniya Federativ Respublikasının Baş naziri Friedrich Merz, hadisədən sonra Hamburq meri Peter Tschentscher (SPD) ilə telefon danışığı aparıb. Merz, “Hamburqdan gələn xəbərlər məni dərindən sarsıtdı. Düşüncələrim qurbanlar və ailələri ilədir”, – deyə bildirib. O, hadisə yerində çalışan bütün heyətə təşəkkür edərək federal hökumətin hər cür dəstəyi verməyə hazır olduğunu bildirib.
Hamburq Ştatı Parlamentinin sədri Carola Veit isə verdiyi açıqlamada, “Hamburqdakı bıçaqlı hücum məni dərin kədərləndirdi. Yaralanan hər kəsə parlament adından tezliklə şəfa diləyirəm. Bütün xilasetmə heyətinə, polis əməkdaşlarına və yardım edən hər kəsə təşəkkür edirəm”, - deyə qeyd edib.
Mədinə Cəlilova
12:46 25.05.2025
Oxunuş sayı: 763
