Xarici xəbərlər

Səudiyyə Ərəbistanında 73 illik spirtli içki qadağası yumşaldılır

Səudiyyə Ərəbistan hökuməti 1952-ci ildən bəri qüvvədə olan spirtli içki qadağasını 2026-cı ilə qədər 600 müəyyən olunmuş turistik bölgədə ləğv edəcək və spirtli içki istehlakına icazə verəcək.

Crossmedia.az xəbər verir ki, yeni plana əsasən, spirtli içkilər yalnız turizm yönümlü məkanlarda istifadəyə veriləcək. Yalnızca seçilmiş beşulduzlu otellərdə, kurortlarda və lisenziyalı müəssisələrdə spirtli içkilərin satışı və istifadəsinə icazə veriləcək.

İctimai yerlər, şəxsi yaşayış sahələri və pərakəndə satış nöqtələri isə mövcud qadağalara tabe olmağa davam edəcək. Yeni tətbiq çərçivəsində yalnız şərab və pivənin istehlakına icazə veriləcək, sərt spirtli içkilər isə qadağan olunmuş olaraq qalacaq.

Səudiyyə Ərəbistanında spirtli içkilər 1952-ci ildə tamamilə qadağan edilmişdi. Qadağa, 1951-ci ildə kral Əbdüləzizin oğlu Şahzadə Mişari bin Əbdüləziz Əl Səudun Ciddə şəhərində keçirilən bir dəvətdə sərxoş halda olarkən Britaniyanın baş konsul müavini Siril Usmanı güllələyərək öldürməsi hadisəsindən sonra gündəmə gəlmişdi. Göstərilən reaksiyalar nəticəsində kral Əbdüləziz 1952-ci ildə ölkədə spirtli içkilərin tamamilə qadağan olunmasına qərar vermişdi.

Mədinə Cəlilova

🖨 Çap et

11:40 25.05.2025

Oxunuş sayı: 742