Tanınmış aktyorlar barəsində məhkəmə qərarı: Yalan ifadəyə görə həbs cəzası
İstanbulda İD İletişim şirkətinin sahibi Ayşe Barıma qarşı aparılan istintaq çərçivəsində şahid qismində ifadə verən tanınmış aktyorlar Halit Ergenç və Rıza Kocaoğlu “yalan ifadə vermək” ittihamı ilə azadlıqdan məhrumetmə cəzasına məhkum olunublar.
Crossmedia.az xəbər verir ki, iddia aktına əsasən, aktyorlar Barıma ilə bağlı ifadələrində həqiqəti əks etdirməyən məlumatlar vermiş, bu səbəbdən barələrində cinayət işi açılmışdır. Məhkəmə prosesi nəticəsində Halit Ergenç 1 il 10 ay 15 gün, Rıza Kocaoğlu isə 1 il 8 ay müddətinə azadlıqdan məhrum edilib. Lakin məhkəmə hökmün icrasını təxirə salmışdır.
Halit Ergenç məhkəmədə çıxışı zamanı özünü müdafiə edərək bildirib:
“İfadəm şahid qismində alınıb və mən yalan danışmamışam. Səmimiyyət nisbi anlayışdır. Eyni layihədə iştirak etdiyimiz insanlarla yaxın münasibətimizin olmaması mümkündür.”
Hər iki aktyor eyni zamanda Gezi Parkı hadisələri ilə bağlı istintaq çərçivəsində də ifadə vermiş və məhz həmin dövrdə “yalan ifadə vermək” ittihamı ilə cəzalandırılmışdır.
Türkiyə mediasında yer alan məlumatlara görə, bu qərarın Gezi Parkı hadisələrindən 13 il sonra verilməsi və aktyorların məhz bu səbəbdən cəzalandırılması onların İstanbul Böyükşəhər Bələdiyyə Başçısı Əkrəm İmamoğluna verdikləri açıq dəstək ilə əlaqələndirilir. Yerli media bu addımı siyasi motivli qərar kimi dəyərləndirir.
Mədinə Cəlilova
00:00 25.05.2025
Oxunuş sayı: 11776
