İstanbulda tarixi görüş: Ərdoğan və Şaraa ortaq gələcək üçün bir arada
Türkiyə Prezidenti Rəcəb Tayyib Ərdoğan və Suriya Prezidenti Əhməd əş-Şaraa arasında İstanbulda mühüm görüş keçirilib.
Crossmedia.az türk mətbuatına istinadən xəbər verir ki, görüş zamanı Türkiyə-Suriya münasibətləri, regional təhlükəsizlik çağırışları və qlobal proseslər ətrafında müzakirələr aparılıb.
Ərdoğan çıxışında Suriyanın sabit və dinc gələcəyinə inandığını bildirib:
“Türkiyə, indiyə qədər olduğu kimi, bundan sonra da Suriyanın yanında olmağa davam edəcək”.
O, ABŞ və Avropa İttifaqının Suriyaya qarşı tətbiq etdiyi sanksiyaların ləğvindən sonra Prezident Şaranın Türkiyəyə ilk səfərini “önəmli və simvolik addım” kimi dəyərləndirib.
Ərdoğan Suriyanın ərazi bütövlüyünün və dövlətin vahid mərkəzdən idarə olunmasının prinsipial əhəmiyyət daşıdığını vurğulayıb.
Türkiyə lideri həmçinin İsrailin Suriya ərazisində həyata keçirdiyi hərbi əməliyyatları sərt tənqid edib və bu məsələdə Türkiyənin beynəlxalq platformalarda prinsipial mövqeyini davam etdirəcəyini bildirib.
Görüş zamanı iki ölkə arasında enerji, müdafiə və nəqliyyat da daxil olmaqla, müxtəlif sahələrdə əməkdaşlığın inkişaf etdiriləcəyi qeyd olunub.
“Qonşuluq və qardaşlıq hüququnun tələblərini yerinə yetirməkdə qərarlıyıq”,- deyə Ərdoğan bildirib:
Suriya Prezidenti Əhməd əş-Şaraa isə sanksiyaların aradan qaldırılması istiqamətində göstərdiyi diplomatik səylərə görə Ərdoğana təşəkkür edib.
Aybəniz Səfərova
19:27 24.05.2025
Oxunuş sayı: 9069
