Son səfər zamanı Azərbaycan-Almaniya əlaqələrinin daha da güclənməsi üçün mühüm adımlar atılıb - DEPUTAT
Son zamanlarda Almaniya-Azərbaycan münasibətləri daha da inkişaf etməkdədir.
İki ölkə arasındakı qarşılıqlı münasibətlər XIX əsrin ikinci yarısından başlayıb. Həmin dövrdə Almaniyanın "Simens qardaşları" firması Gədəbəy bölgəsində iri miqyaslı sənaye layihələrinə start verib.
Almaniya Azərbaycanın müstəqilliyini ilk tanıyan ölkələrdən biridir. 1992-ci ildən etibarən diplomatik əlaqələr qurulub və o vaxtdan bəri siyasi dialoq daha da güclənib. Almaniya Azərbaycanın əsas ticarət tərəfdaşlarından biri kimi enerji və qeyri-neft sektorunda sıx əməkdaşlıq edir. Azərbaycanın neft-qaz sektoru Avropanın enerji təhlükəsizliyində mühüm rol oynayır və Almaniya bu sahədə Azərbaycanın strateji tərəfdaşıdır. Bununla yanaşı, Almaniya Azərbaycanın iqtisadiyyatına, xüsusən infrastruktur, sənaye və texnologiya sahələrinə investisiya qoyur.
İki ölkə arasında mədəni əlaqələr diqqətəlayiqdir. Almaniya Azərbaycanın təhsil və elm sahəsində inkişafını dəstəkləyir. Azərbaycan tələbələri Almaniyanın ali təhsil müəssisələrində təhsil almaqda maraqlıdır və Alman Akademik Mübadilə Xidməti bu istiqamətdə xüsusi proqramlar təqdim edir. Bundan başqa, sərgilər, musiqi festivalları və mədəni layihələr vasitəsilə mədəniyyətlərarası dialoq təşviq olunur.
Həmçinin, Almaniya Cənubi Qafqazda sabitliyin təmin olunmasında mühüm rol oynayır. Ermənistan-Azərbaycan münaqişəsinin həlli çərçivəsində Almaniya sülh təşəbbüslərinə dəstək verib. Almaniya Federativ Respublikasının Prezidenti Frank-Valter Ştaynmayerin Azərbaycana son səfəri bu əlaqələrin inkşafının mühüm göstəricilərindən biridir.
Crossmedia.az mövzu ilə bağlı Milli Məclisin deputatı Ceyhun Məmmədova müraciət edib.
Deputat ilk olaraq bildirib ki, Azərbaycan bu gün ikitərəfli əlaqələrin inkişafı üçün ardıcıl tədbirlər həyata keçirir və bu istiqamətdə mühüm addımlar atır:
“Xüsusilə, Almaniya ilə uzun illər ərzində formalaşmış əlaqələr bu gün də inkişaf etməkdədir. Ermənistan-Azərbaycan münasibətlərinin tənzimlənməsi prosesində Almaniyanın verdiyi dəstək də diqqətəlayiqdir. Bu çərçivədə keçirilən görüşlərdən biri Almaniyada baş tutub. O mənadan Azərbaycan, Almaniya ilə münasibətlərin qorunması və inkişaf etdirilməsində maraqlıdır.
Son səfər zamanı Azərbaycan-Almaniya əlaqələrinin daha da güclənməsi və möhkəmlənməsinə öz töhfəsini verəcək. Bu səfər əlaqələrimizin yeni bir mərhələyə keçidinə və daha da inkişaf etməsinə töhfə verəcəkdir”.
Azərbaycanın bu istiqamətdə atdığı addımlar, ikitərəfli münasibətlərin inkişafı baxımından olduqca əhəmiyyətlidir:
“Təəssüflə qeyd etmək lazımdır ki, bir müddət əvvəl Almaniya prezidentinin sosial media hesabında Ermənistana dəstək xarakterli bir paylaşım edilib. Bu addım Azərbaycanda ciddi narahatlıq doğuran məsələ kimi xarakterizə olundu və bu səbəbdən də Azərbaycan tərəfi sərt reaksiyasını bildirib. Nəticədə, Almaniya tərəfi öz səhvini etiraf edib. Dünən Almaniya prezidenti Azərbaycana səfər edib. Bu səfər əlaqələrimizin inkişafına müsbət təsir göstərəcək və münasibətlərimizdə yeni bir mərhələnin başlanğıcı olacaqdır. Prezident İlham Əliyev bu görüşdə öz mövqeyini bir daha ifadə edib. Bu mövqe qarşı tərəf tərəfindən nəzərə alınacaq və gələcəkdə Azərbaycanla bağlı məsələlərdə daha həssas yanaşma sərgilənəcəkdir. Ermənistanın münasibətlərimizi korlamaq cəhdlərinə qarşı Almaniya tərəfi daha diqqətli olacaqdır. Bu prosesin əhəmiyyəti və reallığı hər kəs tərəfindən qəbul edilir.Gözlənilir ki, Almaniya gələcəkdə bu kimi səhvləri təkrarlamayacaq və Azərbaycan-Almaniya münasibətləri öz inkişaf dövrünü yaşayacaqdır”,- deyə C.Məmmədov fikrini yekunlaşdırıb.
Nəzrin Salmanova
11:13 03.04.2025
Oxunuş sayı: 1361
