Xarici xəbərlər

Rusiya idmanında yeni ümid: FIS iki məşhur adı xatırladı

Beynəlxalq Xizək və Snoubord Federasiyası (FIS) üçqat olimpiya çempionu Aleksandr Bolşunov və ikiqat olimpiya bürünc mükafatçısı Aleksandr Terentyevi 2026/27 mövsümünün Dünya Kuboku ilə bağlı paylaşımında qeyd edib.

Crossmedia.az xəbər verir ki, FIS bu barədə rəsmi “Instagram” səhifəsində video yayımlayıb. Videoda azarkeşlərə qarşıdan gələn mövsümün favoritlərini seçmək təklif olunur. Bununla belə, Bolşunov və Terentyev hələ beynəlxalq yarışlarda iştirak üçün zəruri olan neytral status əldə etməyiblər.

Yeni beynəlxalq xizək mövsümü 2026-cı il noyabrın 27-də Finlandiyanın Ruka şəhərində başlayacaq. FIS rusiyalı idmançıların neytral statusla yarışlara buraxılması barədə qərarını sentyabrın 2-də açıqlayıb.

Rusiya xizəkçiləri 2022-ci ildən beynəlxalq yarışlardan kənarlaşdırılıb. 2025-ci ilin oktyabrında FIS bu məhdudiyyəti uzadıb. Dekabrın 2-də isə İdman Arbitraj Məhkəməsi qərarı qanunsuz hesab edib. Bundan sonra federasiya rusiyalı idmançılara neytral status üçün müraciət etmək imkanı verib. Nəticədə Saveli Korostelyov və Dariya Nepryayeva neytral status alaraq Dünya Kubokunun mərhələlərində iştirak ediblər.

İyulun 7-də Beynəlxalq Olimpiya Komitəsi Rusiya Olimpiya Komitəsinin fəaliyyətinin dayandırılması qərarını müvəqqəti ləğv edib və idman federasiyalarına rusiyalı idmançılara tətbiq edilən məhdudiyyətləri aradan qaldırmağı tövsiyə edib.