Səfir Sultan Hacıyev və Keniyanın Baş naziri arasında görüş keçirilib
Martın 28-də Azərbaycanın Keniya Respublikasındakı səfiri Sultan Hacıyev və Keniyanın Baş naziri, eyni zamanda xarici və diaspora işləri naziri Musalia Mudavadi arasında görüş keçirilib.
Azərbaycanın Keniyadakı səfirliyindən Crossmedia.az saytına daxil olan məlumata görə, görüşdə iki ölkə arasında münasibətlərin dinamik inkişafından məmnunluq ifadə olunub və cari ildə nəzərdə tutulan səfərlərin ikitərəfli və çoxtərəfli əməkdaşlıq sahələrində potensialın istifadəsinə mühüm töhfə verəcəyi vurğulanıb.
Baş nazir Musalia Mudavadi Azərbaycana etdiyi səfərlərlə bağlı xoş təəssüratlarını bölüşüb, iştirak etdiyi COP29 zamanı Azərbaycanın liderliyi ilə qəbul edilən mühüm qərarların əhəmiyyətini qeyd edib.
Tərəflər iqtisadi və sosial sahələrdə əməkdaşlığın genişləndirilməsi imkanlarını müzakirə ediblər. Baş nazir Azərbaycanın rəqəmsal həllər və ictimai xidmətdə əldə etdiyi innovativ nailiyyətlərə diqqət çəkərək, Keniyanın ASAN Xidmət və ölkənin “Huduma” vətəndaşlara xidmət təşkilatı arasında əməkdaşlığın qurulmasına maraqlı olduğunu bildirib. O, həmçinin sərmayələrin cəlb edilməsi, ticarət əlaqələrinin inkişafı və kiçik və orta sahibkarlıq subyektləri arasında əməkdaşlığın gücləndirilməsinin vacibliyini vurğulayıb.
Səfir Sultan Hacıyev bildirib ki, Azərbaycan 2026-cı ildə BMT-nin Ümumdünya Şəhərsalma Forumunun 13-cü Sessiyasına (WUF13) və Ümumdünya Ətraf Mühit Gününə (WED2026) ev sahibliyi edəcək. O, WUF13 çərçivəsində Azərbaycan və Keniya arasında əməkdaşlığın qlobal səviyyədə mühüm töhfə verə biləcəyini vurğulayıb. Baş nazir Mudavadi isə Keniyanın bu təşəbbüslərə dəstək verməyə və WUF13 çərçivəsində sıx əməkdaşlığa hazır olduğunu bildirib.
Görüş zamanı Heydər Əliyev Fondu və Azərbaycan Respublikasının Beynəlxalq İnkişafa Yardım Agentliyi (AİDA) tərəfindən Keniyanın bir sıra təhsil və tibb müəssisələrinə göstərilən humanitar yardımlar da xatırlanıb. Baş nazir bu yardımlara görə təşəkkür edərək, bunun Azərbaycan və Keniya arasında dostluğun və əməkdaşlığın göstəricisi olduğunu qeyd edib.
19:52 30.03.2025
Oxunuş sayı: 1635
