Xarici xəbərlər

Ankara yeni müdafiə əməkdaşlığına hazırlaşır – Üç ölkə ilə ortaq plan

Türkiyə, Qətər, Pakistan və İndoneziya arasında müdafiə sənayesi sahəsində əməkdaşlığın genişləndirilməsini nəzərdə tutan anlaşma çərçivəsi formalaşdırılır. Təşəbbüs müdafiə texnologiyalarının inkişafı, bilik və təcrübə mübadiləsi, kadr hazırlığı və birgə tədqiqat layihələrini əhatə edir. Əsas məqsəd iştirakçı ölkələrin milli müdafiə imkanlarını gücləndirmək və müdafiə sənayesi sahəsində əlaqələri dərinləşdirməkdir.

Crossmedia.az xəbər verir ki, bu barədə Türkiyə mediasında yayılan məlumatda bildirilir. Anlaşma mövcud ikitərəfli əlaqələrin çoxtərəfli əməkdaşlığa çevrilməsinə, yeni layihələrin həyata keçirilməsinə və tərəflərin sənaye imkanlarının birləşdirilməsinə şərait yarada bilər.

Türkiyə ilə Qətər arasında müdafiə sənayesi sahəsində əməkdaşlıq son dövrlərdə birgə investisiya və istehsal modellərinə yönəlib. Bu təcrübənin yeni çərçivədə tətbiqi istehsal imkanlarının bölüşdürülməsi və üçüncü ölkələrin bazarlarına birgə çıxış perspektivlərini genişləndirə bilər.

Türkiyə ilə Pakistan arasında da müxtəlif müdafiə platformaları üzrə əməkdaşlıq mövcuddur. Türkiyənin platformaların hazırlanması, elektron sistemlər, döyüş sursatları və alt sistemlərin istehsalı sahəsində imkanlarının Pakistanın təcrübəsi və ehtiyacları ilə birləşdirilməsi yeni layihələr üçün zəmin yarada bilər. Anlaşmada nəzərdə tutulan təlim və texnologiya transferi isə əməkdaşlığın yalnız hazır məhsulların tədarükü ilə məhdudlaşmamasına imkan verə bilər.

İndoneziya ilə Türkiyə arasında da müdafiə sənayesi üzrə bir sıra konkret layihələr həyata keçirilir. Bunlara milli döyüş təyyarəsi KAAN-ın satışı, KAPLAN MT orta sinif tankının və zirehli transportyorun birgə hazırlanması, eləcə də ATMACA gəmiəleyhinə raketinin tədarükü və birgə istehsalı daxildir. Yeni əməkdaşlıq çərçivəsinin bu layihələr əsasında texnologiyaların birgə inkişafı və istehsal imkanlarını genişləndirəcəyi gözlənilir.

Əməkdaşlıq çərçivəsində birgə tədqiqat və inkişaf layihələrinin hazırlanması, müdafiə sənayesi məhsullarının ayrı-ayrı komponentlərinin ortaq istehsalı, texniki heyətin təlimi və mühəndislik təcrübəsinin paylaşılması nəzərdə tutulan istiqamətlər sırasındadır. Həmçinin hazırlanacaq məhsulların tərəflərin ehtiyaclarına uyğunlaşdırılması və beynəlxalq bazarlarda təqdim edilməsi imkanları da nəzərdən keçirilə bilər.