Aİ və Mərkəzi Asiya arasında yeni əməkdaşlıq planı müzakirə olunur
Aprelin 4-də Avropa İttifaqı (Aİ) ilə Mərkəzi Asiya ölkələri arasında sammit keçiriləcək. Bu məqsədlə xarici işlər nazirləri səviyyəsində hazırlıq görüşü təşkil edilib və yekunda vacib sənəd qəbul olunub.
Crossmedia.az xəbər verir ki, bu barədə xarici KİV məlumat yayıb.
Sənəddə aşağıdakı əsas mövzular əks olunub:
Siyasi əlaqələrin inkişafı;
Ticarət və investisiya imkanlarının genişləndirilməsi;
Energetika və iqlim məsələləri;
Təhlükəsizlik və sabitlik;
İnsanlar arasında əməkdaşlığın artırılması;
Əfqanıstanla bağlı müzakirələr.
Avropa İttifaqının Transxəzər Nəqliyyat Marşrutuna (TCTC) tam dəstək verməsi sənəddə xüsusi qeyd edilib. Aİ və özəl maliyyə institutları bu layihəyə 10 milyard dollara qədər sərmayə qoymağa hazır olduqlarını bildiriblər.
Bununla yanaşı, sənəddə Cənubi Qafqaz bir dəfə xatırlanıb. Burada “dinc Cənubi Qafqaz” ifadəsi işlədilib ki, bunun Avropa diplomatlarının təşəbbüsü olduğu ehtimal edilir. Bununla belə, Mərkəzi Asiyadan Avropaya yükdaşımalar əsasən Azərbaycan vasitəsilə həyata keçirilir. Hazırda əsas marşrut Gürcüstan üzərindən keçsə də, gələcəkdə Azərbaycan, İran və Türkiyə ərazisindən keçən Turan dəhlizinin alternativ olması mümkündür.
Görüşün nəticələri:
Aİ Mərkəzi Asiya ölkələri ilə əlaqələrini gücləndirir və yeni sazişlər imzalamağa hazırlaşır.
Almaniya bu sahədə Aİ-nin əsas lider ölkəsi kimi çıxış edir.
Aİ üçün vacib xammalların təhlükəsiz daşınması prioritet məsələlərdəndir.
Aİ-nin Rusiya ilə əlaqələri bərpa etmək niyyəti yoxdur. Bu səbəbdən, Azərbaycan və Gürcüstan Mərkəzi Asiya ilə Avropa arasında əsas tərəfdaş rolunu oynayacaq.
Azərbaycan Prezidenti Mərkəzi Asiya liderlərinin görüşlərində iştirak edir, Gürcüstanın Baş naziri isə bu yaxınlarda Mərkəzi Asiya ölkələrinə səfərlər edib.
Fatimə Məmmədova
11:12 30.03.2025
Oxunuş sayı: 952
