Məhkəmə Trampın “Amerikanın Səsi” radiosunu bağlamaq cəhdini bloklayıb
Federal hakim ABŞ-nin beynəlxalq yayım şirkəti olan “Amerikanın Səsi”nin fəaliyyətini dayandırmaq cəhdlərini bloklayıb və bu addımı “klassik özbaşına və şıltaq qərar qəbuletmə halı” adlandırıb.
Crossmedia.az xarici mediaya istinadən bildirir ki, hakim Ceyms Pol Oetken, “Amerikanın Səsi”nin nəzarətində olan ABŞ Qlobal Media Agentliyinin (USAGM) 1200-dən çox jurnalist və əməkdaşını işdən çıxarmaq cəhdinin qarşısını alıb. O, agentliyə işçiləri ixtisar etməyi, ofisləri bağlamağı və xaricdəki işçiləri ABŞ-a qayıtmağa məcbur etməyi qadağan edən müvəqqəti məhdudlaşdırma qərarı çıxarıb.
Qərar həmçinin USAGM-in Azad Avropa/Azadlıq Radiosu, Azad Asiya və Azad Əfqanıstan Radiosu kimi yayımçılara maliyyə yardımlarını dayandırmasına da mane olub. Hakim Tramp administrasiyasını konqres tərəfindən qanuni maliyyələşdirilən quruma “balyozla hücum etməkdə” ittiham edib.
“Bu, mətbuat azadlığı üçün həlledici qələbədir və Tramp administrasiyasının demokratiya prinsiplərinə məhəl qoymamasına kəskin etirazdır”, – iddiaçıların vəkili bildirib.
Tramp və digər Respublikaçılar “Amerikanın Səsi”ni “solçu qərəzli” olmaqda ittiham ediblər. Ağ Ev isə bu yayım qurumunu “Amerikanın Radikal Səsi” adlandırıb və Trampın maliyyə kəsintisinin “vergi ödəyicilərinin daha radikal təbliğat üçün pul ödəməməsini təmin edəcəyini” açıqlayıb.
Zəhra Ağayeva
22:24 29.03.2025
Oxunuş sayı: 8366
