Rusiyada Kadırov və FTX arasında gərginlik artır
Rusiyanın Çeçenistan rəhbəri Ramazan Kadırov və Federal Təhlükəsizlik Xidməti (FTX) arasında münasibətlər daha da gərginləşib. Rusiya KİV-lərinin məlumatına görə, Kadırov bir neçə gün öncə Kremli məlumatlandırmadan ərəb liderləri ilə gizli danışıqlar aparıb. Bu görüşlər onun səhhəti ilə bağlı ciddi problemlərinin olması və ailəsini qorumaq üçün xarici qarantor axtarması ilə izah edilir.
Crossmedia.az xarici KİV-ə istinadən xəbər verir ki, FTX Kadırovun bu danışıqlarını aşkara çıxararaq Kremli məlumatlandırıb. Bunun nəticəsində təhlükəsizlik xidməti Moskvada Kadırova yaxın şəxslərin evlərində və biznes obyektlərində axtarışlara başlayıb. Kadırovun Kremldəki mövqeyinin zəiflədiyi və onun birbaşa Putinlə əlaqə qurmağa çalışsa da, buna nail ola bilmədiyi bildirilir.
Bundan əlavə, Kadırova yaxınlığı ilə tanınan və Moskvada onun biznes maraqlarını qoruyan Dövlət Dumasının deputatı Adəm Dəlimxanovun ev həbsində olduğu və deputatlıq toxunulmazlığını itirə biləcəyi iddia edilir.
Müşahidəçilər hesab edirlər ki, bu hadisələr Kadırovun Moskva ilə münasibətlərində ciddi böhranın dərinləşdiyini göstərir. FTX-nin ona qarşı tədbirlər görməsi Çeçen liderin Kreml tərəfindən artıq tam etibarlı fiqur kimi qəbul olunmadığına işarə edir. Proseslərin necə inkişaf edəcəyi isə yaxın günlərdə daha aydın olacaq.
14:41 29.03.2025
Oxunuş sayı: 1219
