Putinin Atəşkəs Şərtləri: Avropa üçün Tələ?
Rusiya Prezidenti Vladimir Putin son danışıqlarda Ukrayna ilə mümkün atəşkəs üçün elə şərtlər irəli sürüb ki, bu, faktiki olaraq Avropa üçün siyasi tələ rolunu oynayır. Politoloq Aleksandra Propokenkonun Karnegi Berlin üçün verdiyi təhlilə görə, Putin Ukraynanın onun tərəfinə atdığı diplomatik topu, ABŞ-la münasibətləri sarsıtmadan, birbaşa Avropaya yönəldib.
Crossmedia.az xarici KİV-ə istinadən xəbər verir ki, Putinin təklif etdiyi əsas şərtlərdən biri Ukraynaya silah tədarükünün tamamilə dayandırılmasıdır. Bu yalnız ABŞ-ın deyil, eyni zamanda Avropa İttifaqının da razılığı ilə baş verməlidir. Lakin Putin çox gözəl anlayır ki, Avropa belə bir addımı atmaq niyyətində deyil. Bu isə Vaşinqtonun Avropaya təzyiqini artıraraq transatlantik münasibətləri daha da gərginləşdirə bilər.
Bundan əlavə, Rusiya lideri Qara dəniz taxıl sazişinin yeni təşəbbüsü üçün Rusiyanın Kənd Təsərrüfatı Bankının SWIFT beynəlxalq ödəmə sisteminə qaytarılmasını tələb edib. Bu tələb isə yalnız Aİ-nin razılığı ilə həyata keçirilə bilər. Görünən odur ki, Putin hər hansı güzəşti yalnız konkret iqtisadi və siyasi qazanclar qarşılığında etməyə hazırdır.
Mütəxəssislər hesab edirlər ki, Putin tələsmir və mərhələli şəkildə irəliləməyi hədəfləyir. Onun əsas strategiyası Qərbin daxilində fikir ayrılıqları yaradaraq, qarşı tərəfi daxildən zəiflətməkdir. ABŞ və Avropa bu yeni diplomatik çağırışa hansı cavabı verəcək – bu, yaxın aylarda dünya siyasətinin əsas gündəm mövzularından biri olacaq.
13:49 29.03.2025
Oxunuş sayı: 9670
