İsrail ordusu Fələstin-Türkiyə Dostluq xəstəxanasını bombaladı
İsrail ordusu Qəzzanın şimalında yerləşən Fələstin-Türkiyə Dostluq xəstəxanasına hava hücumu təşkil edib. İsrail tərəfi xəstəxananın HƏMAS tərəfindən “hərbi komanda mərkəzi” kimi istifadə edildiyini iddia edib.
Crossmedia.az ordunun yaydığı açıqlamaya istinadən xəbər verir ki, xəstəxanadan İsrail qüvvələrinə qarşı hücumlar edildiyi irəli sürülərək binanın “etkisiz hala gətirildiyi” bildirilib.
Yerli mənbələr xəstəxananın və onun yanında yerləşən İslam Universitetinin Tibb Fakültəsinin bombalanaraq məhv edildiyini təsdiqləyib.
İsrailin 7 oktyabr 2023-dən sonra Qəzzada başlatdığı quru hücumları zamanı xəstəxananın İsrail ordusu tərəfindən hərbi məqsədlərlə istifadə edildiyi ortaya çıxmışdı. Netzarim Dəhlizi üzərində yerləşən xəstəxanaya və onun ətrafına İsrail hərbi texnikası yerləşdirilmiş, xəstəxanadakı tibbi avadanlıqların dağıdıldığı görüntüləri sosial mediada paylaşılmışdı.
2011-2017-ci illərdə Türk Əməkdaşlıq və Koordinasiya Agentliyi (TİKA) tərəfindən inşa edilən Fələstin-Türkiyə Dostluq xəstəxanası 33,400 kvadratmetrlik ərazidə, 8 blok, 4 əməliyyat otağı, reanimasiya şöbəsi, laboratoriyalar və 180 palatadan ibarət idi.
İsrail ilə HƏMAS arasında 19 yanvarda qüvvəyə minən atəşkəsdən sonra da xəstəxana möhkəm qalsa da, içindəki tibbi avadanlıqlar ciddi şəkildə zədələnmişdi.
Ümumdünya Səhiyyə Təşkilatının (ÜST) məlumatına görə, İsrailin hücumları nəticəsində Qəzzadaki 36 xəstəxanadan cəmi 18-i fəaliyyət göstərə bilir.
Birləşmiş Millətlər Təşkilatının İnsan Haqları üzrə Ali Komissarlığı yayımladığı hesabatda İsrailin Qəzzadaki səhiyyə sisteminə qarşı sistematik hücumlar həyata keçirdiyini vurğulayıb. Hesabatda, bir il ərzində 27 xəstəxana və 12 səhiyyə mərkəzinin 136 hava hücumuna məruz qaldığı qeyd edilib.
Mədinə Cəlilova
16:45 23.03.2025
Oxunuş sayı: 897
