Azərbaycanın Pakistandakı səfiri: "Qarşımızda dayanan heç bir çətinlik keçilməz deyil"
Pakistanın Azərbaycandakı səfirliyində bu ölkənin Milli Gününün 85-ci ildönümü münasibətilə tədbir təşkil olunub.
Crossmedia.az xəbər verir ki, tədbirdə ölkənin Bakıdakı icmasının təmsilçiləri, eləcə ictimaiyyət iştirak edib.
Əvvəlcə Pakistanda daimi sülh, firavanlıq və inkişaf üçün dualar edilib.
Tədbir iştirakçılarına Pakistan Prezidentinin və Baş nazirinin bu günün Pakistan xalqı üçün əhəmiyyətindən bəhs edən müraciətləri səsləndirilib.
Pakistanın Azərbaycandakı fövqəladə və səlahiyyətli səfiri Qasim Mohiuddin çıxış edərək, Baş nazir Məhəmməd Şahbaz Şərifin Milli Bayram münasibətilə müraciətini səsləndirib.
Hökumət başçısı müraciətində ölkəsinin bugünədək əldə etdiyi uğurlardan bəhs edib.
O bildirib ki, Pakistan hakimiyyəti qazanılan müsbət nəticələrlə kifayətlənməyib, daha böyük uğurlar əldə etməyə çalışacaq:
"Təbii ki, bu nəticələrin əldə olunması üçün güclü iradənin və davamlı səylərin göstərilməsi, eləcə də qarşıda duran məsələlərə kollektiv yanaşma tələb olunur. Ölkəmizin malik olduğu nəhəng potensial, həyata keçirilən düzgün siyasət və milli vəhdət nəticəsində ölkəmiz iqtisadi cəhətdən daha da çiçəklənməyə nail ola, sosial ədaləti təmin edən və dünya ölkələri arasında özünə layiqli yer tuta bilər. Qarşımızda dayanan heç bir çətinlik keçilməz deyil. Mən əminəm ki, yalnız qətiyyət, gərgin fəaliyyət, eləcə də vahid yanaşma nəticəsində biz daha güclü, çiçəklənən və mütərəqqi bir Pakistan dövlətinin formalaşmasına nail ola bilərik".
Diplomat həmçinin ölkəsinin son dövrlərdə əldə etdiyi nailiyyətlərdən bəhs edib.
O söyləyib ki, bu müvəffəqiyyətlərin daha da artırılması üçün dövlət səviyyəsində göstərilən səylər davam etdiriləcək.
11:29 23.03.2025
Oxunuş sayı: 9253
