ABŞ-nin İsraildəki səfirliyi vətəndaşlarına təhlükəsizlik xəbərdarlığı edib
ABŞ-nin İsraildəki səfirliyi bu ölkədəki vətəndaşlarını mümkün raket hücumları və genişmiqyaslı etiraz aksiyalarına qarşı ehtiyatlı olmağa çağırıb.
Crossmedia.az xarici mətbuata istinadən xəbər verir ki, səfirliyin yaydığı rəsmi xəbərdarlıqda ABŞ vətəndaşlarına “şəxsi təhlükəsizliyi nəzərə alaraq hərəkət etmək” tövsiyə edilib.
Bəyanatda qeyd olunub ki, mövcud təhlükəsizlik vəziyyəti səbəbindən qırmızı həyəcan siqnallarının bərpası və genişmiqyaslı nümayişlərin artması müşahidə olunur. Bu səbəbdən ABŞ vətəndaşlarından raket, minaatan, pilotsuz təyyarə hücumları zamanı kütləvi toplantılardan çəkinmələri və yaxınlıqdakı sığınacaqları bilmələri tələb olunur.
İsraildə siyasi gərginlik artır
Həmçinin İsrailin baş naziri Benyamin Netanyahu ölkənin daxili təhlükəsizlik xidməti Şin Bet (Şabak) direktoru Ronen Barı vəzifəsindən azad etmək qərarına gəlib. Bu addım ölkədə siyasi müzakirələri qızışdırıb və müxalifətin çağırışlarından sonra İsraildə genişmiqyaslı etirazlar başlayıb.
Bundan əlavə, martın 18-də İsrail atəşkəsi pozaraq Qəzza zolağına hücumları bərpa edib. İsrailin hücumlarına cavab olaraq Yəməndəki husilər bu ölkəyə raket və pilotsuz təyyarə zərbələri endiriblər. Bugün isə Livandan İsrailə raket hücumu edildiyi bildirilib.
10:42 23.03.2025
Oxunuş sayı: 10978
