Kanadada toplama düşərgəsi qorxusu: “ABŞ bizi də deportasiya edə bilər”
ABŞ prezidenti Donald Trampın sərt miqrasiya siyasətləri müxtəlif ölkələrin vətəndaşlarını təşvişə salıb. Kanadalı siyasətçi Çarli Anqus, ABŞ-da yaşayan Kanadalıların və Avropalıların deportasiya olunma riski ilə üzləşdiyini bildirib.
Crossmedia.az xarici mətbuata istinadən xəbər verir ki, ABŞ hökuməti cinayətkar hesab etdiyi miqrantları Salvadorun mega həbsxanasına göndərməyə davam edir. Son olaraq 238 Venesuela vətəndaşı El Salvadordakı bu həbsxanaya deportasiya edilib. Anqusun sözlərinə görə, eyni vəziyyət Kanadalılar və Avropalılar üçün də keçərli ola bilər.
Anqus açıqlamasında, “Trampın bunu edə biləcəyini bilirik. Bir Kanadalının, bir almanın və ya bir ingilisin El Salvadordakı toplama düşərgəsinə göndərilməyəcəyinə heç bir zəmanət yoxdur” ifadəsini işlədib.
Kanadanın geri addım atmamalı olduğunu vurğulayan Anqus, “Kanada bu çətin dövrdə möhkəm dayanmalıdır. İnsanları ABŞ-ə səfər etməməyə, boykotu davam etdirməyə və güclü qalmağa çağırıram, çünki Kanada o gangsterin üzüyünü öpməyəcək” deyə bildirib.
Anqus, Trampın siyasətlərini açıq şəkildə tənqid edən siyasətçilərdən biridir. O, Trampın tətbiq etdiyi genişmiqyaslı gömrük rüsumları və bunun iqtisadi nəticələri ilə bağlı olaraq, “ABŞ iqtisadiyyatı tam bir sirki xatırladır” şərhini verib.
Bundan əlavə, Kanadalı siyasətçi Trampın Rusiya ilə münasibətləri normallaşdırmaq qərarını və Ukraynada davam edən müharibə fonunda atdığı addımları da tənqid edib
Mədinə Cəlilova
14:25 21.03.2025
Oxunuş sayı: 8603
